سهام البارودي ـ كود//

فاش تفرجت فأول حلقة آكروشيت! “بغيت حياتك” مسلسل مغربي جديد كايدوز فدوزيم! فيه سامية أقريو ونورة الصقلي، وعبد الله ديدان وبزاف د النجوم الجداد فحال مريم الزعيمي وناصر أقباب، ساندية تاج الدّين.. وزيد وزيد! الفكرة زوينة وجديدة ديال ثلاتة د الأشخاص غايبغيو يشفرو حياة ثلاتة د الأشخاص آخرين ومن تما جات السمية ديال “بغيت حياتك”،

لي عجبني فيه أنا هو لوجيناليطي ديال الفكرة، كيفاش إنسان يمكن يشفر حياة إنسان آخر ويعيشها فبلاصتو إلى كان عندو مايكفي من لامانيبيلاسيون وقدر يتلاعب بيه! فكرة خارجة عن المألوف فمسلسلات مغربية لي ولفناها كاتهضر غير على مواضيع كلاسيكية فحال الحريگ والزواج والعگوزة والنسيب والربيب! دوك المسلسلات البئيسة والفقيرة لي كاتخاطب جمهور بئيس وفقير اكثر منها! الفكرة ديال “بغيت حياتك” فيها واحد لاكومبليكسيطي كاتخليها تهز النيڤو على المسلسلات الأخرى! وحتى الكاستينغ كان فالمستوى واخا شي هفوات ولكن ماعليش!

دابا وصلت للحلقة تسعود وكانتمنى المسلسل يبقى غادي فهاد النيڤو، مايطبزوه ليمّاه العين فالحلقات الجاية ولا الحلقة الأخيرة!