محمد سقراط-كود///
باش شي بلاد تتطور وتتقدم ممحتاجاش شي وصفة سحرية خاصة، راه سبقونا دول خرجوا من الفقر والازمة وولاو دول متقدمة بإتباع نفس الوصفة لي خاصها إرادة سياسية واضحة، محاربة الفساد والاستثمار في التعليم، لحد الآن المغرب خارية عليه في هادو بجوج، ولكن راه كيتقاتل بلا فايدة وكيضيع وقت كثير، وأجيال ورى أجيال كيضيع فيها المغرب، حسب نيت الاحصائيات الرسمية راه كاين جيل ديال الشباب ماقاري مزيان معندو حرفة معندو صنعة او مهارات كتأهلوا لسوق الشغل، وطبعا هذا ماشي ذنب الشباب راه دور الدولة لي مقراتش وأهلات وطورات أهم فئة عمرية من سكانها.
بالنسبة ليا أول قرار خاص يتخاد من أجل اصلاح التعليم هو تطهير القطاع من الخوانجية وإلغاء تدريس التربية الإسلامية وتعويضها بتدريس التربية المدنية ونظرية التطور وإتباع منهج علماني في التدريس لا يراعي خصوصية المنطقة، حيت هاد المفهوم ديال الخصوصية المغربية والعربية والإسلامية والشمال افريقية والشرق الأوسطية هو لي مخلينا اللور اللور، اليابان في عهد ميجي زطمات على هادشي كامل وبدات تحديث وغربنة البلاد والقضاء على معاقل التقليدانية بحال الساموراي لي هو فخر الامة اليابانية معقلوش عليه، وفي ظرف وجيز ولاو من اعظم القوى العسكرية والاقتصادية العالمية واحتلوا اغلب آسيا وهاجموا ميريكان، وواخا خيروا في الحرب والبلاد تدمرات ناضوا من جديد داروا بين عينيهم ميريكان وتبعوها في الطريق نحو التنمية حتى وصلوا لثاني اقوى اقتصاد في العالم محرد تلاتين عام بعد اسقاط جوج قنابل نووية عليهم.
حاليا مدن كبيرة في المغرب كتعرف نمو ديمغرافي كبير، بحال طنجة وسلا وكازا من ديما، ولكن في المقابل مظاهر التمدن كتقتل فيها بشكل يومي، وهادشي جاي من ان هاد النمو سواء من الهجرة او الولادات في نفس المدينة راه ناقص تعليم وقراية وتمدن، والنتيجة مدن كبيرة عقيمة مافيها حياة، هاحنا تقريبا ربعين مليون معندنا كتاب عالميين معندنا أفلام كتنافس في المهرجانات الكبرى معندنا فنانين وصلوا الفن ديالهم للعالم بلا مايغتاصبوا تاحد، لا رسم والا شعر ولا أدب عموما والا تاحاجة، ربعين مليون كناكل القوت وتسنى الموت وتتناطح في البنيان، راه بلا اصلاح حقيقي وجذري للتعليم كنضيعوا أجيال وزمن مهم من تاريخ المغرب لي صعيب نعاودوا من بعد نلحقوا على الركب.
