كود سبور//

غادي يدير الدولي المغربي نايف أگرد عملية، حسب ما أعلن عليه الفريق ديالو اولمبيك مارسليا الفرنسي، وبالتالي منطقيا ما غاديش يشارك مع المنتخب الوطني المغربي فالجوج ماتشات الوديين ضد كل من الإكوادور والباراگواي يومي 27 و 31 مارس 2026، وهما اول ماتشات للناخب الوطني الجديد محمد وهبي مع ليكيب ناسيونال.

وأعلن أولمبيك مارسيليا صباح اليوم الاربعاء، أن نايف أگرد غادي يدير عملية جراحية غدا الخميس 12 مارس 2026، لعلاج ألم العانة المزمن، ووضح النادي ان اللاعب المغربي كان كايعاني خلال الأسابيع اللي فاتت من ألم قاصح وما لاقيش راحتو، وهذا الشي خلاه ما قادرش يلعب.

مارسيليا زادو وضحو وقالو انه بالرغم من العلاج اللي تلقاه نايف أگرد من طرف الطاقم الطبي للنادي، ولكن الحالة ديالو تستدعي اجراء عملية جراحية، وانه غادي يبدا برنامج تأهيلي تحت إشراف الطاقم الطبي.

واكدو مارسليا ان نايف أگرد غادي يدير جهدو كامل باش يرجع للتيرانات دغيا، يشارك معهم فالمراحل الأخيرة من الموسم.