كود سبور//

كتبقى مشاركة المنتخب المغربي فأولمبياد باريس2024، مشاركة تاريخيّة وفيها إنجاز غير مسبوق بالنسبة لكرة القدم المغربية بالوصول إلى نصف النهائي، خصوصا وأن الأسود وقبل هذه الدورة تأهلو للدور الثاني مرة واحدة وحتى المشاركة فالأولمبياد كانت بشكل متقطع وكانت الكورة المغربية كاتغيب بين الدورات وترجع تشارك.

وسبق للمنتخب الوطني المغربي لكرة القدم التأهل إلى الألعاب الأولمبية 8 ديال المرات، وكان أولها فأولمبياد طوكيو 1964، وفيها ودع المنتخب المغربي الأولمبياد من الدور الأول بصفر نقطة بعدما خسر مع المجر ويوغوسلافيا.

والمشاركة الثانية كانت فأولمبياد ميونيخ 1972، وفيها قدر المنتخب المغربي يتأهل للدور الثاني بعدما احتل المركز الثاني فالمجموعة الأولى ورا ألمانيا برصيد 4 نقاط، جمعها من رباح على ماليزيا بـ6 لزيرو وتعادل مع الميريكان زيرو لزيرو وخسارة مع ألمانيا بـ3 لزيرو، وقبل ما يودع المنافسات من ربع النهائي اللي كان عبارة على جوج مجموعات واحتل المركز الأخيرة فالگروب الثاني بزيرو نقطة، بخسارة مع روسيا بـ3 لزيرو، وخسارة مع الدنمارك بـ3 لواحد، وخسارة مع بولندا بـ5 لزيرو.

وجات المشاركة فأولمبياد لوس أنجلوس 1984، وما قدرش المنتخب المغربي يفوت الدور الأول، بعدما احتل المركز الأخير فالگروب الثالث برصيد 4 نقاط، واخا تعادل مع ألمانيا فعدد النقاط اللي تأهلت كثاني المجموعة، ولكن الألمانيين كان عندهم امتياز النسبة العامة، وكانت حصيلة المنتخب المغربي فهاد المشاركة هي تعادل مع ألمانيا بـ2 لجوج، ورباح على السعودية بواحد لزيرو، وخسارة مع البرازيل بـ2 لزيرو.

وفأولمبياد برشلونة1992، كان مصير المشاركة المغربية فكرة القدم الخروج من الدور الأول بنقطة واحدة، جمعها المنتخب المغربي من تعادل مع كوريا الجنوبية بنتيجة واحد لواحد، وخسارة السويد بنتيجة 4 لزيرو، وخسارة مع البارغواي بنتيجة 3 لواحد، واحتل المنتخب المغربي المركز الأخير فالگروب الثالث.

ورجع المنتخب المغربي للمشاركة فأولمبياد سيدني2000، ومرة اخرى كان الإخفاق عنوان المشاركة المغربية، وودع المنافسات من الدورة الأولى وبزيرو نقطة، بعد خسارة مع الشيلي بنتيجة 4 لواحد، ومع كوريا الجنوبية بواحد لزيرو، ومع إسبانيا بجوج لزيرو.

وفأولمبياد آثينا2004، ودع المنتخب المغربي المنافسات من الدور الأول بسبب النسبة العامة اللي كانت لمصلحة كوستاريكا بعدما تعادلو المنتخبين فالنقاط بـ4 نقاط لكل منتخب، وتعادل فالماتش بيناتهم بزيرو لزيرو، وخسر المنتخب المغربي مع البرتغال بـ2 لواحد، وربح العراق بـ2 لواحد، ولكن احتل المركز الثالث فالگروب الثالث وتقصا.

وجات المشاركة أولمبياد لندن2012، وما كانتش النتيجة أحسن من المشاركات الماضية، حيث ودع المغرب المنافسات من الدور الأول برصيد 2 النقاط، جمعها من تعادل مع الهندوراس بنتيجة 2 لجوج، وخسارة مع الجابون بواحد لزيرو، وتعادل سلبي مع إسبانيا بنتيجة زيرو لزيرو، واحتل المركز الثالث فالگروب الرابع.

وبعد الغياب عن 2 دورات، جات المشاركة فأولمبياد باريس2024، اللي كاتبقى أحسن مشاركة بالنسبة للمنتخب المغربي الاولمبي، وحقق فيها انجاز تاريخي بالوصول لنصف النهائي وكان قريب يتأهل للفينال، وبداو الأسود أولمبياد باريس فالدور الأول برباح على الأرجنتين بطلة الأولمبياد جوج مرات، وخسرو الماتش الثاني مع أوكرانيا بنتيجة 2 لواحد، وفاقو فالماتش الثالث وربحو العراق بنتيجة 3 لواحد، وتأهلو على راس الگروب الثاني برصيد 6 نقاط، وربحو المريكان فربع النهائي بنتيجة 4 لزيرو، وتأهلو للدومي فينال اللي خسروه بنتيجة 2 لواحد، وكانو يقدرو يتأهلو للفينال حسب ملاحظات الكثير من المتتبعين، ومازال غايلعبو ماتش الترتيب على الميدالية البرونزية ضد المنتخب المصري غدا الخميس.