كود – وكالات//

قال الرئيس الأوكراني فولوديمير زيلينسكي ان أوكرانيا مستعدة تشارك الخبرة ديالها باش تعاون فالدفاع على البنية التحتية ديال النفط فالشرق الأوسط، ومن جهتو قال وزير الخارجية الأوكراني أندريه سيبيها ان كييف توصلات بطلبات من شركاء دوليين باش تقدم المساعدة فمجال الدفاعات المضادة للطائرات المسيّرة، وضاف أن المسؤولين كيناقشو دابا “خطوات ملموسة” باش يتعاونو فهاد المجال.

فمريكان علن الرئيس الأمريكي دونالد ترامب نهار الخميس على إعفاء وزيرة الأمن الداخلي كريستي نويم من منصبها، بعدما تعرضات لاستجواب من طرف مشرعين جمهوريين فجلسات استماع فالكونغرس هاد الأسبوع على قبل شي مواضيع من بينها كونطرات متعلقة بشركة عندها علاقات سياسية.

وكتب ترامب هاد القرار فوسائل التواصل الاجتماعي، وكشف أيضاً أنه باغي يعين السيناتور ماركواين مولين من ولاية أوكلاهوما باش يعوضها فهاد المنصب، كما علن على بوسط جديد ما كانش من قبل لنويم، وهو “المبعوثة الخاصة لدرع الأمريكتين”، وقال إن هاد المبادرة الأمنية الجديدة غادي تكون موجهة لدول نصف الكرة الغربي.

وفالشرق الأوسط ارتفعات بزاف الأثمنة بالنسبة لي بغا يخوي دبي بسبب الحرب الإيرانية لي كتقيس الإمارات، وذكرات صحيفة فاينانشال تايمز أن ثمن الخروج بطائرة خاصة لعائلة مكوّنة من ربعات الناس وصلات حتى لـ250 ألف دولار.

وحسب نفس التقرير، ضوبلات أثمنة كراء الطائرات الخاصة، وحتى لي بغا يمشي يخرج بطموبيل من دبي لعمان أو السعودية غا تقام عليه تسافيرة غالية، حيث ولاوت الأثمنة كتوصل حتى لآلاف الدولارات.