كود سبور//

طاح الدولي النيجيري فيكتور أوسيمين فنفس الفخ اللي كان طاح فيه الدولي الكاميروني كريستيان كوفاني، فاستفزاز الجمهور المغربي، قبل مواجهة المنتخب الوطني المغربي فدومي فينال كاس افريقيا “المغرب2025”.

وفتصريح له قال فيكتور أوسيمين على حضور الجمهور المغربي والتأثير ديالو على نتيجة الماتش بين المنتخبين المغربي والنيجيري، ان المغرب غايكون عندو امتياز اللعب قدام آلاف الجماهير المغربي، ولكن هو ولاعبين المنتخب النيجيري مولفين يلعبو قدام 80 و 90 ألف مشجع، داكشي علاش ما كايحسوش بحتى شي ضغط.

نفس الكلام ديال النيجيري فيكتور اوسيمين، كان قالو الدولي الكاميروني كريستيان كوفي قبل مواجهة المنتخبين، فاش دار مقارنة بين جمهور دورتموند الالماني اللي كايلعب معهم، وقال انهم احسن من المشجعين المغاربة، ولكن ملي دخل للتيران تلف وخسرو هو والكاميرون قدام المغاربة فـ تيران مولاي عبد الله.