احمد الطيب كود الرباط//

بعض قيادات الأحرار ملي كيهضرو كتحس “مكاينش” الصدق فكلامهم، كيديرو السياسة بمواقف ماشي فوقتها ولا فبلاصتها، مثلا هجوم مصطفى بايطاس، الناطق “للي مكيعرف يدافع على الحكومة ولا ينطق” باسمها ، على الاتحاد الاشتراكي، حيث الأخير بدل من خطابو من معارضة “لايث” إلى معارضة “التهراس”، مكانش فيه “صدق” لأن “سي بايطاس” بان كيقلد بنكيران فالأسلوب وبعض قادة البي جي دي فالمزايدات السياسية، لانه بطبيعة الحال في ميزان السياسة راه بايطاس معندوش المعدل في بورصة النقاش السياسي (باقي في مرحلة التمرين كما هو الحال في مهنة المحاماة لي دخل ليها في عهد وزير العدل السابق محمد اوجار…).

هاد النوع من السياسة ما عندهاش منافع لا للحكومة ولا للحزب ولا للعلاقة مع الاغلبية.

من غير قضية 50 مليار درهم تكلفة الفساد فالمغرب سنويا، وللي مشكوك فيه حيث مكايناش معطيات دقيقة حول تكلفة الفساد، كيف قال فوزي لقجع، وزير الميزانية، فالبرلمان، واللي بان أنيق فجوابو ودار سياسي عميق من خلال تحدي رئيس هيئة النزاهة بالإتيان بدليل حول هذا الرقم، ولكن ما يهجم على هيئة النزاهة ولا يحط من قيمتها، كيف كيدير بعض قادة الاحرار.

اوجار وبايتاس وبودلال لي كيشتغلو بمنطق “الأعيان” والعائلات السياسية فحزب الاحرار، غايكون ابعادهم في حكومة المونديال رباح سياسي لهاد الحزب لي فيه كفاءات كبيرة وانتخابات 2021 طلعات شباب فالمستوى وكيخدمو واخا “ما عندهمش مع السياسة” وكذلك كاينين رجال اعمال كيعرفو غير يخدمو بحال وزير التربية الوطنية الحالي أو وزير الاستثمار الجديد.

لا أحد يختلف بأن للي كيترأسو مؤسسات الحكامة، قبل تشكيل الحكومة، أغلبهم اتحاديون، ولكن ممحسوبينش على لشكر ولا أصدقاءو من غير رئيس المجلس الاعلى للتعليم الحبيب المالكي لي هو أضعف رئيس مؤسسة حكامة، مقارنة رضى الشامي رئيس المجلس الاقتصادي والاجتماعي سابقا ولا احمد الحليمي المندوب السامي للتخطيط السابق، ولا أمينة بوعياش، رئيسة المجلس الوطني لحقوق الانسان، للي يحسب لها انها قدرات تطور المجلس وتعطيه روح حداثية كما أنها قطعات مع ريع “اليساريين الكسلاء”.

وكان أوجار القيادي في حزب التجمع الوطني للأحرار، غضب حزب الاتحاد الاشتراكي للقوات الشعبية، بعدما اتهم اليسايين بـ”السطو” على مؤسسات الحكامة، وذلك بعد أيام قليلة من صدور التقرير السنوي للهيئة الوطنية للنزاهة والوقاية من الرشوة ومحاربتها، للي وقف ضعف العمل الحكومي في مجال محاربة الفساد، وانزعاج الحكومة من تقرير المجلس الاقتصادي والاجتماعي والبيئي كشف حجم البطالة في صفوف الشباب.

للي خاص بايتاس يدير هو يترافع عليها كوزير وكممثل الساكنة بلاصت ما يدخل فالبوليميك “للي مكيعرفش يديرو” وهاد الناطق لي مكيعرفش ينطق مشرحش للمغاربة قرار التسوية الضريبية لي كولشي تالف ومخلوع، رغم أن هذا واجبو، وكذلك اوجار من الجهة الشرقية لي خصو يخرج “المرجعية الحقوقية” ديالو ويواجه هجوم الاسلاميين على وزير العدل. ولكن اوجار ضربها بصقلة فنقاش مدونة الأسرة.

اللي خاصهم يديرو هو التركيز اليوم على مشروع مدونة الاسرة اللي كيتبنى تحالف محافظ كبير ضدها. مشروع خاصو يدوز مع تجويد امور كثيرة فيه بروح حداثية. هاد الشي كيطلب تعرف خصومك. تعرف تشرح للناس باسلوب واضح بسيط وتفضح خصومك اللي باغيين يرجعو لمرا للماضي ويزيدو يهينوها