سهام البارودي ـ كود//
المغرب البلاد الوحيدة لي تقدر توقف طاكسي تقوليه ديني لشي بلاصة يقوليك لا ماغاديش! لا غانحطك غا فالشاريع ! ماندخلش للزنقة! لا ماعنديش الصرف! واحد الضسارة وواحد قلة الأدب ففئة مهمة من مالين الطاكسيات كاتخليهم مكروهين من طرف عباد الله! خصوصا الطاكسيات د المدن الكبار، بحال مراكش وكازا! وماكاينش المغربي لي ماتلقاهش عندو شي ذكرى سيئة مع شي مول الطاكسي! إيه طبعا كاينين ولاد الناس، رجال وشباب محترمين ولكن للأسف وسط منهم واحد الرباعة د الشلاهبية الخامجين خنزو الصورة د مول الطاكسي!
الحادثة الأخيرة لي وقعات فمراكش راه غير شوية من بزّاف كايوقع يوميا، وكايعانيو منّو المواطنين بشكل كبير قبل من التوريست ولكن الدولة ماكاتهدرعهمش ، واش حيت مّالين الطاكسيات قادّين ينتظمو على شكل عصابات فحال دوك العصابات لي كانو كايتعداو على الدراري ديال أوبير؟ تخايل معايا أن أوبير شركة كبيرة معروفة فالعالم كامل جرّاو عليها مالين الطاكسيات ! باش؟ بالبلطجة والتعدّو والتهراس والعصا! الدراري كايخدمو وخايفين يوقفو عليهم مالين الطاكسيات يضربوهم !
انا كمواطنة مغربية كانقولها، كانكره فاش كانضطر نركب فشي طاكسي، حيت عندي معاهم ذكريات خايبة بزاف، شحال من واحد كان باغي ينصب عليا، وشحال من واحد نصب عليا، وشحال من واحد رفض أنه يهزني حيت كنت مع العائلة ديالي وفضّل يهز كل بلاصة من جهة، وشحال من واحد بغا يديني بالضوبل د الثمن، بلا مانهضرو على الوسخ والگارو وتاشفارت وقلة الترابي كاطلع فالطاكسي كاتلقاه خانز، فمو خانز، ترمتو خانزة ، حوايجو خانزين ومطلع الجاج وساد عليه وسط طاكسي خانز، أما لانسيتي شي حاجة فالطاكسي غي عوّل ماغاترجعش ليك وزدت كرهتهم فاش عرفت بلي كايتعداو على الدراري لي كايخدمو فالتطبيقات فحال أوبير وكريم كايضربوهم ويفرشخو ليهم الطوموبيلات. وفحالي بزاف د المغاربة عاشو ذكريات خايبة مع الطاكسيات.
هادشي علاش هاد قطاع النقل خاصو يتبدل من الجذر، يوليو شركات د الطاكسيات فحال فالعالم كامل، يولي الطاكسي نوع من المقاولة الذاتية، و يتفتح الباب للتطبيقات فحال كريم وأوبير وياسر باش ينقلو عباد الله ويتخلق جو سليم من المنافسة وديك السّاعة بزز عليه مول الطاكسي غاينقي حالتو وحوايجو وعقلو وغايخدم على راسو بالقانون باش يوفر سبل الراحة للزبون !
عوض هاد البلطجة و تانصابت لي دايرة ولي كاتوسخ صورة البلاد!
