محمد سقراط-كود
بالنسبة ليا مصر هي أهم دولة في هاد القنت وأكثرها تأثيرا، إلا ولات مصر قومية عربية كولشي كيتبعها ويولي قومي حتى عبد الكريم الخطابي الريفي كان قومي عربي حسب ما كتب وقال، إلى مصر تحولات لدولة إخوانية كيفيض القادوس ديالهم على العالم كامل، الى مصر شي نهار ولات علمانية غادي تأثر علمانيتها في كاع هاد القنت، ومصر كتأثر في السعودية براسها، السعودية نهار قررات تشدد من بعد حادثة الإستيلاء على مكة من طرف جهيمان العثيبي، راه كانوا المصريين هوما صوت هاد التوجه، شوف غير الشيخ كشك مثلا شحال كان مشهور في المغرب نيت راه كان كينافس الشاب خالد في الشهرة، وحتى من بعد كشك ها عمرو خالد ها محمد حسان ها الحويني وآخرون.
الى كانت السعودية عطات بلادن أشهر إرهابي في العصر الحديث، فمصر هي لي عطات الظواهري لي كان القائد الفعلي والمنطر للقاعدة اما بلادن كان غير شوال الرز ، ولد الفشوش كيمول ويبان في الواجهة وصافي، راه كون كانت مصر شيعية كنتي تلقى العالم العربي نصو شيعة، المغرب نيت وتلقاه مقسوم بني مكادة روافض وبير الشيفا نواصب، هاعلاش بالنسبة ليا السيسي هو رحمة من الله سبحانه وتعالى سيفطو للعالم الإسلامي باش يخلص مصر من الإخوان المسلمين والمتطرفين بشعى انواعهم وطبعا النتيجة صوتهم خف شوية في العالم العربي.
أن السيسي يتعاير في المغرب راه حشومة وعيب والله، السيسي راه حابس واحد القادوس كون يطلقوا غادي يغرق هاد الجهة من العالم كلها في بوخرارو ديال الأصوليين والحروب الاهلية والعمليات الإرهابية، السيسي بالنسبة ليا بطل حقيقي ورجل سلام ووجب احترامه وتوقيره ودعمه في المجهود الكبير لي دار لتخليص وطنه من الإخوان المسلمين، لي وصلات نتيجتو حتى لعندنا اما ره كون كولشي مطلي بيهم ونرجعوا لنقطة الصفر ماقبل الالفين.
