كود سبور//

برأ الطالياني كارلو أنشيلوتي مدرب ريال مدريد الإسباني الدولي المغربي ابراهيم دياز من مسؤولية الهدف الثالث اللي ماركاوه البارصا عليه، البارح السبت ففينال كاس ملك الصبليون، واللي كان سبب فخسارة الفريق للقب، واخا ما قالش بشكل مباشر إن الكرواتي لوكا مودريتش هو اللي غلط.

وفتصريح له ما حملش كارلو أنشيلوتي مسؤولية الخطأ لابراهيم دياز، اللي كان جاياه الكورة ناقصة من عند الكرواتي لوكا مودريتش، واللي قطعها كوندي لاعب البارصا قبل ما توصل لعند دياز، وضربها نيشان لمرمى ريال مدريد وماركا هدف رباح البارصاويين، وقال مدرب ريال مدريد: “دياز كان كايصحاب له مودريتش غايلوح له الكورة من ورا ظهرو، ولكن الباص ديال مودريتش كان قصير”.

وخسرو ريال مدريد مع البارصا بنتيجة 3-2 فكلاسيوكو مشى حتى للأشواط الإضافية، وكان كل فريق منهم قريب من الرباح، ولكن البارصا عرفو يربحو ويديو كاس ملك الصبليون.