سهام البارودي – كود//

سمعت الاغنية الاخيرة ديال جيلان خولة – وا وليدي- لي مستوحاة من الاغنية الشعبية و عجباتني بزاف، و فكرت بلي المغرب بصح محظوظ بزاف بالجيل الجديد ديال الفنانة المغاربة خصوصا المغنيين، و تفكرت مؤخرا كنت كانتريني فواحد لاصال فمدينة ڤيرساي فالضاحية الباريسية و سمعت طوطو مطلوق، طوطو مطلوق على بعد امتار من قصر ڤيرساي، اكيد لويس السادس عشر لي سكن فداك القصر و جدو لويس الرابع عشر لي بنا القصر ماعمرهم كانو كايتخايلو بلي شي نهار احفاد احفاد الرعايا ديالهم الفرنسيين غايتمزّكو لمغنّي مغربي و هوما كايديرو الرياضة.

هادشي علاش كانقول بلي أحسن جيل ديال الفنانة هوا هذا لي كانشوفوه اليوم و هادشي راجع لبزّاف ديال الاسباب:

-أولا جيل ماشي بلحاس و لحّاس ماكايسعاش الگريمات و ماكايتخننش على سيدنا باش يتكلف بالعلاج ديالو، جيل ذكي، عارف الحياة باش معجونة كايقلب يدير الفلوس و يعيش من الفن ديالو بكرامة و عزة نفس بكل استقلالية بلا بكا بلا شكا.

-ثانيا و هذا سبب مهم بزاف، هاد الجيل كاتحس بيه قريب من الثرات المغربي و كايحاول يخشيه فالالوان الموسيقية فحال الراب و البوب و يدير واحد النوع د العصرنة للاغاني الثراتية، فحالي دار سعد المجرد مع “حمّادة” و فحالي دارت جيلان مع ” وا وليدي” و فحالي دارت اسماء المنور مع ” عندو الزين عندو الحمام”… و زيد و زيد ،هاد الجيل كاتحس بيه متصالح مع الهوية المغربية و متشبّع بيها، ماشي جيل معقّد من راسو و من الهوية ديالو و باغي يقلد المصريين و يعني الغنا ديال المصريين و المشارقة … بالعكس الجيل ديالنا أول جيل غايكون وصل الاغنية المغربية للمشارقة فحال “انتي باغية واحد” ديال سعد المجرد لي كتاسحات مصر و الشرق الاوسط فاش يا الله بانت.

ثالتا و هذا سبب مهم، الجيل الجديد ديال الفنانة جيل ذكي فالاخيارات الفنية ديالو، كانظن ماعمر كانت هاد الفورة فالانتاج الغنائي فالمغرب، ايه طبعا ساهم فيها الانترنيت و اليوتوب و لكن ماغانكروش الابداع الكبير لي بينوه الشباب المغاربة فگاع الالوان الموسيقية من گناوة للشعبي للراب للراي و زيد و زيد …

المغرب محظوظ بوليداتو الفنّانة المغنيين ديال الجيل الجديد و العقبة نشوفو نفس الابداع فالثمتيل و الكتابة و الفنون الأخرى ….