محمد سقراط-كود///

أنا فرحان للشعب الإيراني بالقصف الإسرائيلي  لي كيستهدف قادة النظام الإسلامي المتطرف المجرم المعذب الجبان المتجبر على الإيرانيين ومعيشهم في العذاب وفي حبس ديني كبير سميتو إيران، نظام كيعذب ويعتاقل ويقتل كل ماهو جميل وحر وأنيق ومبدع ومختلف في داك البلاد، أنا فرحان لإخواننا العرب في الأحواز العربية لي مستعمراها إيران وكتنهب خيراتها النفطية وفرحان لإخواننا السنة في إقليم بلوشستان لي كيناضلو سنين هادي من أجل الاستقلال من نظام الملالي الغاشم.

وبالنسبة ليا هاد الحرب الإسرائيلية على إيران راها حرب تحرير للشعب الإيراني وللشرق الأوسط والعالم ضد نظام متطرف كان حريصا طيلة سنين حكمه على نشر التطرف والعنف والمشاركة في الحروب الدينية ودعم الحركات الإرهابية في العالم، ابتداء من البوليزاريو حتى لحماس، هاد النظام لي حاول يختارق المغرب اكثر من مرة وهددنا علانية، وللأسف نجح في اختراق طنجة من خلال اختراق الجالية المغربية في بلجيكا وهولندا ونشر التشيع بينها، كون كان في التشيع الربح راه نحن أولى به من الفرس راه تحكمنا أسرة من حفدة سيدنا علي شخصيا.

بالنسبة ليا أي نظام ديني متطرف هو نظام عدو للإنسانية وخاص يطيح بأي طريقة، إيران دولة من الأجمل في العالم وأقدم الحضارات وشعبها واعي مثقف وفنان ولكن بلادهم مختطفة من قبل الفقهاء ورجال الدين ومعيشينهم في القرون الوسطى، إيران من المفروض تكون بلاد عظمى واقتصاد قوي وشعبها عايش الرفاهية نظرا للموارد الطبيعية والبشرية لي عندها ولكن بسباب الفقهاء واللحايا ورجال دين راها كتعيش في القرون الوسطى معادية مع كولشي وكتنشر هاد الثقافة في العالم، هاد الحرب على إيران هي فرصة للشعب الإيراني باش يتحرر من حكم الملالي وخاصو يستغلها من أجل تحرير إيران من الفكر القروسطي وإطاحة نظام كان سبب في أغلب الكوارث في الشرق الأوسط بطريقة مباشرة أو غير مباشرة.