كود – وكالات//

قررات فرنسا تمنع كتاب موجّه للبنات المسلمات الصغيرات، مني علن وزير العدل الفرنسي جيرالد دارمانان باللي كتاب بعنوان ’’أنا المسلمة الشابة” ما بقاش مسموح يتباع ولا يتوزّع على القاصرين، حيث فيه مضامين كتحرّش على الكراهية وكتدعو للعنف، وقال بلّي عطى تعليماتو باش النيابة العامة تبلغ بهاد ’’الكتاب الإسلاموي‘‘.

دارمانان كتب فنهار الجمعة 27 فبراير 2026 منشور فـمنصة إكس وقال فيها بلّي حماية الدراري خاصها تكون من العنف الجسدي والنفسي والجنسي، وحتى من الاستغلال والتلقين، وأكد بلّي مدير حماية الشباب بلغ المدعي العام بالكتاب وبالمؤلف ديالو.

الكتاب من تأليف أحمد بن مبارك بن قذلان المزروعي، وكيتقدّم على أساس دليل أخلاقي وسلوكي للبنات المسلمات الشابات، ولكن تقارير إعلامية فرنسية ووثائق قانونية قالت بلّي فيه توجيهات كتمنع التشبّه باللباس الغربي والاختلاط وميخرجوش البنات بلا ولي ولا محرم الخ…

وحسب نفس المعطيات، المحامية لارا فطيمي دارت شكايات، واعتبرت بلّي بعض المقاطع فهاد الكتاب “كتدعو للقتل”، وهاد الشي كيخليه يدخل فإطار المتابعة الجنائية.

قرار المنع جا بالاعتماد على قانون 16 يوليوز 1949 اللي كينظم المنشورات الموجّهة للشباب، وهاد القانون كيمنع أي محتوى فيه تحريض على التمييز أو الكراهية، ولا شي حاجة تقدر تضر بالنمو الجسدي ولا العقلي ولا الأخلاقي ديال الأطفال والمراهقين.

وقبل هاد الشي وزير الداخلية الفرنسي كان خرج قرار فـ 23 فبراير 2026 بخصوص نفس الكتاب، ودخل حيز التنفيذ نهار 27 من نفس الشهر، وكيخلّي السلطات دير إجراءات المنع اللي منصوص عليها فالقانون.