كود سبور//

كيواصل الدولي المغربي أمين حارث نجم أولمبيك مرسيليا الفرنسي عروضه القوية وذلك قبل أسابيع على إنطلاق منافسات كأس العالم قطر 2022، واللي غادي يشارك فيها مع المنتخب الوطني المغربي.

ونجح أمين حارث البارح فقيادة أولمبيك مرسيليا لتحقيق فوز مهم فالجولة 4 من ليكروب ديال دوري ابطال اوروبا، وساهم فتسجيل الفريق الفرنساوي 2 بيوت فمرمى سبورتينك ليشبون البرتغالي.

امين حارث تختار أفضل لعاب فالمباراة ما بين أولمبيك مرسيليا وسبورتينك ليشبون، حيث حيح فالماتش وحصل على احسن تنقيط بمعدل 8.12 حسب مؤشر هوسكورد ديال الأرقام والإحصائيات.

أمين حارث نجح فاصطياد ضربة جزاء من كرة ميتة، ماركا منها صاحبو ماتيو كندوزي البيت الأول لأولمبيك مارسيليا، قبل ما يعطي أسيست ديال البيت الثاني لأليكسيس سانشيز واللي حتى هو ما عطلش الكادو ديال النجم المغربي وحط الكرة فالمرمى.