كود – كازا//

المغني ديال الراب المغربي، ديزي دروس، فاجأ الجمهور ديالو ملي اختار الممثل المغربي أمين الناجي باش يكون بطل الفيديو كليب الجديد ديال الأغنية “HRRSS”.

ديزي دروس نشر فالحسابات ديالو فمواقع التواصل الاجتماعي تيزر تشويقي للكليب، فيه لقطات تمثيلية جمعاتو مع أمين الناجي، وهاد الشي عطى للعمل واحد الطابع سينمائي وشوّق المتابعين باش يعرفو القصة اللي غادي يقدّمها الكليب.

التيزر لقى تفاعل كبير وإعجاب من طرف الجمهور، وعدد من المتابعين عبّرو على إعجابهم بفكرة مشاركة أمين الناجي فهاد العمل، وتوقعو أن الكليب يكون فمستوى عالي من ناحية الصورة والإخراج، خصوصاً أن ديزي دروس معروف بالأعمال البصرية المميزة ديالو.

وكتعتبر أغنية “HRRSS” خامس عمل كيصدر من الألبوم الجديد ديال ديزي دروس، وهي أول أغنية من هاد الألبوم اللي قرر يصوّرها على شكل فيديو كليب، الشي اللي زاد من حماس الجمهور وانتظارهم لصدور العمل كامل.