كود سبور//

توصلو لاعبين منتخب الأردن بالبريم ديال كاس العرب 2025 من عند الاتحاد الدولي لكرة القدم، بعدما خرج الأمير علي بن الحسين رئيس الاتحاد الأردني لكرة القدم، تشكى من هذا الشي وقال ان رئيس الفيفا كايبتزهم باش يدعموه.

الأمير علي بن الحسين، خرج هذه المرة وأعلن ان اللاعبين الأردنيين توصلو ببريمات الوصول لفينال كاس العرب، وقال على “X”: “كانشكرو ادارة الفيفا حيث صرفت بشكل مفاجئ داكشي اللي كايستاهلوه اللعابا ديالنا والطاقم التقني بعدما وصلو لفينال كاس العرب فديسمبر اللي فات. كان هذا الشي خاصهم ياخدوه قبل 8 شهور”.

وكمل الأمير الأردني: “واخا هذا الشي مزيان، ولكن ما كايحيدش الخوف ديالنا فعالم الكورة من قيادة الفيفا، ولا المعاملة اللي كانت مع الاتحاد الاردني فالماضي، وهذا دليل على الصعوبات اللي كانواجهوها كاملين، والتي كاترتبط عمومًا بانتخابات رئاسة الفيفا”.

واكد رئيس الاتحاد الأردني: “هذا الشي ما غاديش يبدل الموقف ديالنا تجاه قيادة الفيفا، ما غاديش ندعمو انفانتينو وما غاديش نصوتو عليه”.