كود ـ مراكش//

قررات غرفة الجنايات فمحكمة الاستئناف بمراكش، اليوم الجمعة 7 نونبر، تأجيل محاكمة عدد من المنتخبين والمسؤولين المتابعين فملف كبير كيتعلق باختلالات فتدبير أملاك الدولة، حتى لـ28 من هاد الشهر.

وخلال جلسة اليوم أمرات المحكمة الشرطة القضائية بإحضار أحد المتهمين بالقوة وهو المدير الجهوي السابق للأملاك المخزنية بجهة مراكش آسفي، اللي غاب على الجلسة ديال اليوم بحال الجلسات اللي قبلها، بلا سبب معروف.

فالمقابل، حضرو باقي المتهمين، ومنهم المدير السابق ديال الوكالة الحضرية، اللي تواصل مع المحكمة عن بعد حيت كيقضي عقوبة ديال عشر سنين فملف آخر ديال الرشوة، من بعد ما طاح متلبس عن طريق التبليغ المباشر لرئاسة النيابة العامة.

الجمعية الوطنية للدفاع عن حقوق الإنسان وحماية المال العام، اللي كيمثلها عبد الإله طاطوش، كانت حاضرة بدورها، وأكدات أن المحكمة استجابت لطلبها باش تاخذ جميع الوثائق ديال الملف.

القضية كيرجع أصلها لتحقيقات دارها قاضي التحقيق فملف كيضم منتخبين معروفين بحال: العمدة السابق ديال مراكش العربي بلقايد، يونس بنسليمان، وعبد العزيز البنين، واللي متابعين بتهم ثقيلة بحال “تبديد أموال عامة” و“تزوير وثائق رسمية”.

الملف باقي مفتوح، والجلسة الجاية فـ28 نونبر غادي تكون حاسمة، خصوصاً بعد أمر المحكمة بإحضار المدير الجهوي اللي بقا متواري على الأنظار.