كود سبور//

سلطت جريدة “ماركا” الإسبانية الضوء على الرجوع القوي ديال الدولي المغربي سفيان امرابط مع ريال بتيس الاسباني، بعد 4 شهور من الغياب على الفريق بسبب الاصابة اللي جاتو قبل كاس افريقيا والعملية الجراحية اللي دارها من ورا الكان.

سفيان امرابط تألق بشكل واضح مع ريال بيتيس فأول ماتش له مع الفريق بعد الرجوع من الغياب، وهو الماتش اللي كان باناثينايكوس اليوناني ضمن منافسات اليوروبا ليك، وهو الماتش اللي ماركا فيه لاعب الوسط المغربي هدف واعر، فماتش ربحوه بنتيجة 4-0.

وقالت عليه “ماركا”: “مع تغيير أسلوب اللعب وملي حدا بوسط لاعب الوسط الدفاعي الوحيد فالفريق، بين أمرابط إمكانياتو الاستثنائية، بدنيًا وتكتيكيًا، والتمركز ديالو فالتيران اكد انه عنصر أساسي ومهم فالفريق، وإلى جانب الدور ديالو فتحقيق التوازن لبيتيس، ماركا الهدف الأول به بتوني ريال بيتيس”.

سفيان امرابط لعب كثر من ساعة فهاد الماتش، وقدر يماركي هدف مهم خلى ريال بتيس يقلبو النتيجة، وكانت الاحصائيات ديالو واعرة، حيث قطع الكورة للخصم 4 المرات وربح 2 ثنائيات ضد الخصم وعطى 65 تمريرة ناجحة من اصل 69، وهذا الشي راه واعر بالنسبة للاعب يالاه راجع من غياب طويل بسبب الاصابة.

هذه الرجوع القوي ديال سفيان امرابط غادي يخلي كل من تنبأ بأنه صافي طاح المستوى ديال يراجع التوقعات ديالو عليه، حيث اللاعب المغربي فهاد العامين اللي دازو نقص وما بقاش كيف كان خصوصا بعد التجربة ديال مع مانشستر يونايتد النگليزي واللي ما كانتش إيجابية، ومن جهة أخرى إلى بقى بهاد النيفو مع ريال بيتيس غادي يكون مهم للمنتخب المغربي فمونديال 2026 كيفما كان فمونديال 2022، مع العلم ان الناخب الوطني محمد وهبي ما عيطش له للتوقف الدولي ديال هاد مارس، باش يخليه يتأنتيگرا مع بيتيس حيث يالاه راجع من الاصابة.