كود سبور//

أكد الدولي المغربي سفيان أمرابط نجم مانشستر يونايتد النگليزي أن الجمهور اللي غيجي لمونديال 2030، غيتمتع فالمغرب وأن المملكة فيها تيرانات مزيانين، بالإضافة للتيرانات الجديدة اللي غتبنا على قبل كوب ديموند.

وجاوب سفيان أمرابط على سؤال ديال واحد من مشجعين مانشستر يونايتد فالموقع الرسمي ديال النادي على الرأي ديال النجم المغربي فتنظيم المغرب لكأس العالم 2030 بالشراكة مع إسبانيا والبرتغال، وقال: “متحمس بزاف، راه اللي غيجي إلى المغرب غيدوز وقت زوين وغيتمتع بالأكل والطقس والفنادق والتيرانات اللي كتبنا حاليا، عندنا ملاعب واعرة، وكاينين حتى تيرانات جديدة كتنبا على قبل المونديال”.

وعبر سفيان أمرابط على الحب ديالو للأكل المغربي وقال:

“المطبخ المغربي هو المفضل عندي، فهو مطبخ متنوع، ويشتهر بالطاجين والدواجن واللحوم والأسماك اللذيذة، وي، الطعام المغربي شهي للغاية”.

وبخصوص اللاعب القدوة ديالو ملي كان صغير قال الدولي المغربي: “فالحقيقة ما كانش عندي قدوة، خويا كبر مني بـ10 سنين، داكشي علاش هو اللي كنت كنتبعو ديما، ونقدر نقول أنه هو القدوة ديالي”.

وأعتبر سفيان أمرابط أن الدولي البرتغالي كريستيانو رونالدو هو أحسن لاعب لعب ضدو، وبالنسبة لباش حس ملي زلق على النجم الفرنسي كيليان مبابي فدومي فينال كوب ديموند 2022، وحيد له الكورة قال النجم المغربي: “ما حسيت بوالو، كنت مركز على اللعب وصافي، وكنا خاسرين فالنتيجة بهدف واحد، درنا گاع اللي فجهدنا باش نرجعو فالماتش وكنا قراب نتأهلو للفينال”.