كود – وكالات//

قالت الفنانة الفرنسية أماندا لير، وبالأسلوب لي معروف عليها، إنها ما بقاتش مهتمة تدخل فعلاقة عاطفية، وأكدات أنها مرتاحة فحياتها وهي بوحدها.

مني تستاضفات فالبرنامج الصباحي ديال إذاعة RTL، بمناسبة الترويج للمسرحية «L’Argent de la vieille»، تسولات على حياتها العاطفية، وجاوبت بلا تردد: «سديت الحانوت، آخر راجل غادي يشوفني عريانة غادي يكون الطبيب الشرعي».

الفنانة، اللي عندها 85 عام، شرحات أنها كتستمتع بالعزلة وما كتشوفش فيها حتى مشكل، خصوصاً أنها بحكم خدمتها كتكون ديما معها الناس، من الجمهور حتى للصحافيين والمخرجين وغيرهم.

وقالت بمعنى واضح أنها كتبغي تكون حرة فحياتها اليومية: وتلبس اللي بغات، كتاكل اللي بغات، وكتنعس فوقت اللي بغات، وما كتحبش تكون مسؤولة قدام شي حد.

أماندا لير، اللي عاشت علاقات مع عدد من الأسماء المعروفة، من بينهم الفنان سلفادور دالي والموسيقي برايان جونز وديفيد بوي، كانت قالت فـ2024 بلي تخلات على فكرة الارتباط، ولكن ماشي على المشاعر.

ودابا كتقول الفنانة بلي مرتاحة فدارها فبروفانس، وسط المشاش وشجر الزيتون، وأنها كتتوقع تموت فدارها وتبقى بوحدها، وأكدات أن الحياة وسط الأحفاد ماشي من الأمور اللي كانت كتشوف راسها باغاها.