عثمان الشرقي ـ كود//

فصيل ألتراس “ستار بويز” لي كيشجع رجاء بني ملال، علق لافتة كبيرة فوسط المدينة، مُقابل المعلمة المعروفة “I love Beni Mellal”، مكتوب فيها:

“لا صحة، لا تعليم، لا وزين… زادوها بالأجانب والمختلين”.

هاد اللافتة اعتبرتها المجموعة صرخة كاتعبر على الواقع اللي كايعيشوه شباب بني ملال: مستشفيات هشة، تعليم غادي وكيطيح، بطالة خانقة، ومشاريع تنموية منعدمة.

من المدرجات للشارع

“ستار بويز” اللي معروفين بالإبداعات ديالهم فالمدرجات، هاد المرة خرجوا برسالة مباشرة للشارع. ماشي غير تشجيع ولا تيفو، ولكن موقف ضد السياسات اللي، حسب تعبيرهم، حولات بني ملال لمكان كايترحلو ليه الأجانب والمختلين اللي جايين من مدن أخرى، واللي بعضهم ولى كايشكل خطر على سلامة الساكنة وكيزيد يفاقم مشاكل اجتماعية كانت موجودة من قبل.

احتجاج بلغة الألتراس

الرسالة ديالهم بينات أن الألتراس فالمغرب ما بقاش غير فصيل ديال الكرة، ولكن تحول لقوة شبابية كتسول على مشاكل المدينة، وكتضغط بطريقتها. الجمهور هنا ما بقاش كيهضر غير فالملعب، ولكن حتى فالأزقة والساحات العامة.

تفاعل كبير

الصورة ديال اللافتة تنشرات فالسوشيال ميديا، وتلقات بزاف ديال التعاليق. كاين اللي شافها معبرة وواقعية بزاف، وكاين اللي شافها علامة على الغضب الكبير ديال شباب بني ملال من الإقصاء وضعف التنمية، خصوصاً إلى قارنّوها بمدن أخرى كاتستافد من بزاف ديال المشاريع.