كود – وكالات //

العاصمة الألبانية تيرانا نايضة  فيها الروينة للنهار السادس، مورا مابدات الاحتجاجات لي  قادوها آلاف الشباب والطلبة، ولكن دغيا تطورات لمواجهات خطيرة مع البوليس، لدرجة أن العافية  شعلات  فمبنى المحكمة العليا، وتم اقتحام مبنى البرلمان ووزارة التعليم.

الخسائر المادية والبشرية ف تيرانا كبرات بزاف ف ظرف أيام قليلة. المواجهات والضريي بالحجر تسببوا ف تخريب واجهات مؤسسات سيادية وبنوك وممتلكات عامة.

https://x.com/pw_gun/status/2112122089473994988/video/1?s=46

البوليس علن على توقيف 500 متظاهر، وإصابة كثر من 120 عنصر أمني وعشرات المحتجين بسبب لgاز والقرطاس د الما.

السباب ديال هاد الغضب الشعبي مخلطة بين ما هو اقتصادي وسياسي,الشرارة الأولى ناضت حيت الرسوم والتقييد فالجامعات غلاو بزاف والتعليم تدهور، ولكن المطالب دغيا كبرات وولاو الناس كيطالبوا باستقالة رئيس الوزراء “إيدي راما” بسبب اتهامات بالفساد، وزاد كملها واحد المشروع سياحي فخم فالساحل الجنوبي نوض صداع كبير مع السكان.

وخا هاد الروينة كاملة، رئيس الوزراء الألباني متبت ف الكرسي ديالو. “إيدي راما” خرج وعلن باللي ما غاديش يستاقل حيت عندو شرعية انتخابية، وبلي الهدف ديالو هو يدخل ألبانيا للاتحاد الأوروبي ف 2030،  وزاد وضح باللي كاين فرق كبير بين حق الطلبة ف التظاهر السلمي، وبين هاد أعمال العنف والتخريب اللي كتمس مؤسسات الدولة.