سهام البارودي – كود//

أكتوبر هو الشهر ديال التعريف والتوعية بسرطان الثدي! واحد من السرطانات لي كايصيب بزاف ديال النساء فالعالم كامل! مع التقدم الطبّي اليوم كاينين بزاف ديال العلاجات لي كاتضمن الشفاء منّو! يعني ماشي فحال شحال هادي فاش كان السرطان كايعني الموت! ولكن بشرط أن الاكتشاف ديالو يكون فمرحلة مبكّرة! وهادشي كايكون إلى كانت المرا كاتفحص راسها ولا كاتمشي عند الطبيبة تفحصها بشكل دوري! مرة فالسنة مثلا! الله يشافي گاع المرضى والله يسهّل لگاع العلماء (ديال بصّح) لي خدامين فلابوراطوارات باش يلقاو أحسن علاجات بأقل الأعراض الجانبية! ماشي العلماء ديال الملاوي !

وخاصو يكون مناسبة باش المغربيات يتفكرو راسهم شوية ويدّيوها فصحّتهم لي الأغلبية كاينساوها و ماكايستثمروش فيها! شحال من وحدة كاتمشي تقلب راسها؟! شحال من وحدة كاتمشي عند الطبيب ودير التحاليل ولو غي مرة فالعام تعرف شنو بيها؟! طبعا قليل! قليل حيت التطبيب فالمغرب كايبغي الإمكانيات المادية لي ماعندش كلشي وحتى فاش كاتكون الإمكانيات المادية بنادم كاتلقى عندو حمار مكسل فدماغو وماعندوش الوعي بأهمية التحاليل والتقلاب وزيارة الطبيب بشكل دوري ومادمتي فالواجهة صحيح فصيح ماعندك لاش تمشي للطبيب! هاكا كايفكرو الأغلبية د المغاربة حتى لنهار كايطيح وماكايفهمو فيه الطبّا حتى حاجة !

خصوصا العيالات! سامحين فراسهم وفصحتهم! كاتبقا حياتها كاملة مقابلة وصفات الكيكة بدون بيض وعصير لاڤوكا بدون أڤوكا واللحسة والقويلبات وتبييض المناطق الحساسة ومضاربة مع الراجل والاولاد والعگوزة والجارات حتى كاطّيح بشي مرضة !

واخا فالسنين الأخيرة ولاو بعض البنات كايمشيو لاصال وكايتسوقو لشنو كاياكلو ولكن بالمقابل كاين واحد الرغبة عند شريحة كبيرة ديال العيالات فالغلض! ها لي باغا تكبر البزازل ها لي باغا تكبر المؤخرة ها اللحسة ها القويلبات! الهبيلات طبعا كايكبرو غا للمزاليط حيت لي لاباس عليهم كايبغيو العيالات الرشيقات! الگلاس فالدار والمرقة والزيت والخبز وقلة الحركة وقلة الرياضة كاتخلي بزاف د المغربيات يعانيو من السمنة !

وماكايتسوقوش لراسهم! ماكايتسوقوش لصحتهم! لعينيهم! للمناطق الحساسة! لبزازلهم! الزواق كاتلقاهم كايطيرو فيه ولكن أهم حاجة لي هي الجسم ديالهم كايتعاملو معاه هوا اللخر والواعرة فيهم هي لي كاتمشي ضربها بتحميمة من السيمانة للسيمانة وتسلخ الجلدة ديالها بالكيس الكحل والما طايب! واش هادي مرا ولا حمدوشية كاتشرب الما طايب من المقراج ؟

كاين بزاف د الإهمال وبزاف د الجهل وبزاف د قلة الحب للذات فالتعامل د المغربية مع الجسد ديالها! وهادشي لي كايخليها تتعطل فالكشف على الأمراض فاش كايجيوها وهادشي لي كايقتل بزاف د المغربيات كل عام! الإهمال والجهل وقلة ذات اليد!