الرئيسية > آش واقع > أكاديمة الرباط فارضة على مترشحي التعاقد يجيبو الإجازة قبل ما يخرجو النتائج وفئة كبيرة ماعندهاش.. مسؤول بالأكاديمة لـ”كود”: غنلقاو حل للناس اللي توفقو وماخداوهاش بسبب كورونا
03/12/2020 07:00 آش واقع

أكاديمة الرباط فارضة على مترشحي التعاقد يجيبو الإجازة قبل ما يخرجو النتائج وفئة كبيرة ماعندهاش.. مسؤول بالأكاديمة لـ”كود”: غنلقاو حل للناس اللي توفقو وماخداوهاش بسبب كورونا

أكاديمة الرباط فارضة على مترشحي التعاقد يجيبو الإجازة قبل ما يخرجو النتائج وفئة كبيرة ماعندهاش.. مسؤول بالأكاديمة لـ”كود”: غنلقاو حل للناس اللي توفقو وماخداوهاش بسبب كورونا

عفراء علوي محمدي- كود//

مجموعة من المرشحين لاختبارات أطر الاكاديميات اللي دوزو فالمؤسسات التابعة للأكاديمة الجهوية دالرباط سلا القنيطرة حصلو حصلة كبيرة بعدما تطلب منهم بشكل رسمي يجيبو شواهد الإجازة، حيت منهم ناس كثار عاد تخرجو، وماجال ماخرجاتش ليهم شهادة الإجازة، ودفعو للتعليم غير بشهادة النجاح.

فئة مهمة من المترشحين، اللي اليوم كيدوزو الشفوي، احتجو على مواقع التواصل الاجتماعي، بحكم أن الكليات ديالهم مازال ماخرجات ليهم شهادة الإجازة، وعندهم آخر أجل لاستكمال الملف نهار الجمعة، يعني قبل ما يخرجو نتائج المباراة ويتعلن على الناجحين.

“كود” تكلمات مع حسن اليازيدي، رئيس قسم تدبير الموارد البشرية فالأكاديمية، اللي كينوب فهذ الفترة على محمد أضرضور، رئيس الأكاديمية اللي تصاب مؤخرا بفيروس كورونا المستجد، باش تسولو على مصير هذ الفئة اللي مهددة بالإقصاء، خصوصا وأن مجموعة من الجامعات مازال ماعطات شواهد الإجازة، بسبب اجتياز الامتحانات ديال الدورة الربيعية فوقت متأخر، والظروف الوبائية اللي فرضها كوفيد 19.

اليازيد صرح، فاتصال هاتفي، انه فالاصل مايمكنش السماح بالمشاركة فهذ المباراة دون التوفر على شهادة الإجازة، لكن نظرا للظرفية الوبائية اللي كيمر منها المغرب، تم قبول الترشيحات بشهادة النجاح فقط، وتعطى للمشاركين مهلة باش يجيبو شهادة الإجازة، اللي الأغلبية فيهم حصلو عليها، كيف كيقول.

وزاد المسؤول ان هذشي ماكتحددوش الأكاديمية فقط، بل الجامعات اللي هي شريكة ليها، ووزارة المالية اللي كتشرط شهادة الإجازة بشكل إلزامي للحصول على هذ الوظيفة، “لكننا غنحاولو حلول باش يكونو الفرص متكافأة بين جميع المشاركين، سيما وأنه كاين عندنا خصاص كبير فبعض المواد، بحال الرياضيات والفرنسية”، على حساب هضرتو.

وقال أنه ضروري تكون إجراءات تدبيرية، “وحنا كنتفهمو انه كاين البعض اللي غيتعذر عليهم يجيبوها، ولو ان أغلب الجامعات دابا عطات الإجازات، والبعض الآخر بدات كتوزعها”، كيف قال اليازيدي.

“والتنسيق مع رؤساء الجامعات جاري باش حتى الفئات اللي غتوفق وماغتكونش كتتوفر على الإجازة ماتحرمشاي، ونضمنو حنا بالتالي هذ المناصب الشغل، أنا ماكنظنش واش عندنا بزاف لكن غالقاو حلول باش نيسرو الأمور الإدارية مع الشركاء ديالنا”، هكذا ختم اليازيدي تصريحو ل”كود”.

موضوعات أخرى

22/01/2021 15:00

مايا شي مرات كاتزبالي فاللايفات! و هاد المرة زبالات بزاف ! واش نتي بعقلك كاتهاجمي ضحايا الاغتصاب و ترضي ليهم اللومة ؟ واش مافراسكش بلي كاينين عيالات مزوجات كايتمارس عليهم الاغتصاب شنو غاتقولي ليهم ؟ هاد الديسكور راه مالايقش على ليماج ديال المرأة المتحررة لي باغا تسوقيها لراسك! آطونسيو!

22/01/2021 14:30

الصحرا المغربية مخلياهم بلا نعاس.. القائم بأعمال سفارة ميريكان فالجزائر ما بغاش يعطيهوم موقف إدارة بايدن وها شنو قال

22/01/2021 14:00

2 عسكر من قوات الكومندوز المغربية مفقودين فعرض البحر. الفرقة جرها تيار بحري وشي وحدين رجعوا للساحل المغربي وجوج عامو حتى للسواحل الإسبانية وسط المواج