كود أكادير///

هادي كثر من شهرين على إصدار القرار العاملي رقم 41/23 لي كايقول ممنوع يدور شي طاكسي عمرو كثر من 15 عام فمدينة أكادير ولكن باقي خدامين شي طاكسيات قدام ومكرفصين بحال 205 وأونو 1998 وغيرها من الخردة كيف عاينات كود البارح وسط أكادير وبالظبط المنطقة السياحية.

اللولبي ديال الطاكسيات (صحاب الگريمات) فأكادير مبغاش يمتاثل للقرار العاملي ويجدد الطوموبيلات ديالو، على عكس التطبيقات لي أغلبيتهم شباب ونقيين وكايتعاملو مع المواطنين معاملة زوينة، مثلا بالليل كورسة ديال طاكسي من المنطقة السياحية ولا لاكوط حتى لحي السلام ولا الداخلة ماتوصلش لـ30 حتى 35 درهم ومول الطاكسي يقدر يهز أي واحد لقاه فالطريق اويلا رفض يديك لشي بلايص بحال تكوين ولا أدرار حيث كايقولو كايرجعو خاويين على عكس تطبيقات لي غادي يوصل الكليان لنفس الوجهة بـ25 درهم او أقل مع سيرفيس نقي هادشي لي خلا عدد من المواطنين يبقاو يشدو التطبيقات عوض الطاكسي لي مابغاش يطور راسو.

لوبي الطاكسيات خص الوالي أمزازي يواجهو وخص يتدخل ويطبق القانون ويمنع هاد التسيب لي كاين فقطاع مهم ف ثاني مدينة سياحية فبلادنا خصوصا وأننا مقبلين على تنظيم تظاهرات كبار بحال الكان وكأس العالم ومامقبولش هادشي لي كاين. الجمعيات ديال المهنيين أغلبيتهم كايدافعو غير على مصالح اللوبي مول الگريمات ومكتهمهم حتا حاجة اخرى وهادشي السلطات عارفينو.