كود ـ أكادير//

احتلال الملك العمومي في أكادير رجع حاجة عادية خصوصا فالمنطقة السياحية بحال صونابا وأكادير باي لي حتى واحد مكيهضر فيه مع صحاب الريسطوات والقهاوي والمحلات على عكس مناطق اخرى لي السلطة كاتدير فيها خدمة فهاد الجانب.

مؤخرا كانت حملة كبيرة ضد احتلال الملك العمومي فأكادير وهي لي لقات ترحيب كبير فصفوف الساكنة ولكن المشكلة أن هاد الحملة ماقرباتش للحي الراقي وسط أكادير “صونابا” أو فونتي حيث تما صحاب القهاوي والريسطوات محتلين الشوارع دون حسيب ولا رقيب وهادشي لي مقلق المتتبعين ديال الشأن المحلي ف عاصمة سوس، واش الحملة غير على الدراوش والأحياء الشعبية وصحاب صونابا دايرين مابغاو؟ يتساءل مواطن هضر مع گود.

السلطة المحلية فأكادير خصها تدير خدمتها وتحرر الملك العمومي ماشي غير فالأحياء الشعبية ولكن خصها تكون على كولشي بدون استثناء حيت هادشي كايسيء لبلادنا.