كود -وكالات//

توفى ملك النرويج هارالد الخامس، اليوم الجمعة 28 غشت 2026، على 89 عام، من بعد ما تكرفصات حالتو الصحية فالأيام الأخيرة.

القصر الملكي النرويجي علن أن هارالد توفى بسلام فمستشفى جامعة أوسلو، صباح اليوم، مع 6:35، بعدما كان دخل للمستشفى يوم 17 غشت بسبب عدوى بكتيرية فالدم. والأيام اللي من بعد، علن القصر أن الحالة الصحية ديالو تراجعات، قبل ما توصل لمرحلة ’’خطيرة بزاف‘‘.

هارالد الخامس كان شد العرش النرويجي فـ17 يناير 1991، من بعد وفاة والده الملك أولاف الخامس، وبقى على العرش لأكثر من 35 عام، وفالسنوات الأخيرة، ولى كينقص من المشاركات الرسمية ديالو بسبب التقدم فالسن والمشاكل الصحية المتكررة، من بينها التهابات فالجهاز التنفسي وعملية فالقلب.

وقبل إعلان الوفاة، تجمعو مئات النرويجيين قدام القصر الملكي فالعاصمة أوسلو، جايبين معاهم الورد والشموع، باش يسقسيو فالحالة الصحية ديال الملك.

ومع وفاة هارالد الخامس، كينتاقل العرش لولي العهد هاكون، الابن الأكبر ديالو، اللي كان كيتولى مهام الملك مني كان باه مريض.