كّود – طنجة //

فعملية هدم بناية قديمة بحي سوق الداخل العريق بمدينة طنجة، تم العثور، وفق مصادر جمعوية محلية، على على جوج ساريات قديمة كتحمل آثار حضارة قديمة، وباقة حالتهم مزيانة الشي للي كيتعد امتشاف مهم في علم الآثار يقدر يقدم معطيات مهمة على تاريخ المدينة وحضارتها.

لكن هادشي خاص علماء الآثار والخبراء المختصين هوما اللي يأكدوه بعدما تعطى ليهم الفرصة من طرف المسؤولين عن وزارة الثقافة قبل أن تعبث بهم الأيادي.

فالدول اللي كتحترم التاريخ والثقافة ديالها كتنوض فيها كاع السلطات مسرعة في مثل هاذ الحالات باش تحمي الآثار المكتشفة أولا، وتوقيف أشغال الورش المعني، ثم دعوة الخبراء للقيام بعملهم وتحديد قيمة الآثار المكتشفة.

فاعلون ثقافيون بمدينة طنجة تحركوا بسرعة ودعوا السلطات فالمدينة باش تعطي الأمر بتوقيف أشغال الهدم لفترة مؤقتة إلى حين التوفر على جميع المعطيات الأثرية المرتبطة بالساريتين ومدى احتمالية وجود آثار أخرى بالمكان مخافة كسرها أو إتلافها دون قصد لما قد تمثله من إضافة نوعية تغني الذاكرة الحضارية لمدينة طنجة.