عن أفريكا أنتلجنس //

حسب تقرير دارو موقع أفريكا أنتلجنس، شركة ستارلينك لي كتخدم الأنترنت من الأقمار الصناعية لقات صعوبات كبيرة باش تدخل المغرب حيث شركات الاتصالات المحلية كتعارض هاد الخدمة.

التقرير تيقول انه شركة ستارلينك ديال رجل الأعمال الأمريكي إيلون ماسك من 2024 وهي كتحاول تدخل السوق المغربي، ولكن كتلقى مقاومة قوية من شركات الاتصالات المغربية كيقول الموقع .

حتى لدابا حسب نفس المصدر ، الوكالة الوطنية لتقنين المواصلات (ANRT) ما عطاتهاش الترخيص الرسمي لشركة ستارلينك باش تقدّم الخدمة، وهادشي كيعني أن بعض المغاربة كيستعملو الخدمة من اشتراكات دولية اللي ماشي قانونية حيت باش ستارلينك تخدم رسمياً خاصها موافقة ANRT.

إلا دخلات ستارلينك للمغرب السيرفيس غادي يتحسن بزاف فقطاع الاتصالات والاقتصاد الرقمي فالمغرب، حيث كيعطي سرعة كبيرة وتغطية مزيانة باتمنة مناسبة.

ستارلينك مشروع تابع لشركة سبيس إكس، الهدف ديالو يوفر إنترنت خفيف من الأقمار الصناعية، خصوصاً للمناطق اللي ما فيهاش بنية تحتية قوية للاتصال، بحال المناطق الجبلية لي فالمغرب .