محمد سقراط-كود///

أغلب الفنادق الصغرى والرياضات لي عندهم خدمة ممتازة وماكلة لذيذة وموقع رائع كنلقى في الأراء ديال الضيوف الأجانب لي دوزو شي أيام عندهم كيشكرو فكولشي ولكن في اللخر كيقولوا للأسف مكاينش الشراب، وشحال من بلاصة كنمشي ليها أنا نيت وكنقول للأسف مكاينش الشراب، الشراب ماشي هو تسكر تعربط وتوقف على السطافيط تقوليهم طلعني طلعني، الشراب راه غير كاس ديال الوايت وأين بعد المرات مع ماكلة لذيذة كيزيدها لذة، وكيخلي تجربة الطعام والكلسة لا تنسى، شحال من تيراس زوينة كتطل على منظر شاعري كتشهى تشرب بيرة من بعد نهار ديال لعيا والتعب والإرهاق، حتى كتلقى راسك مجبر تشرب أتاي أتاي أتاي حتى كيجيك فقر الدم، من بين أكثر المتع لي كيعبرو عليها الرحالة صحاب الدراجات في المغرب هي فاش كيلقاو شي أوطيل عندو بيرة باردة من بعد نهار ديال الطريق وسط جبال الأطلس، داك اللحظة كتكون بالنسبة ليهم كتستاحق دوك الألاف الكيلمترات لي ضربو كاملة، ولكن للأسف الفنادق لي متوفر فيهم الشراب قلال بزاف وغاليين في الثمن على بزاف ديال الرحالة، شحال من واحد كيكون داير طراجي من أوروبا لجنوب إفريقيا ماغاديش يضرب نص الميزانية غي في الفنادق المصنفة في المغرب على ود بيرة لي من المفروض تكون موجودة حتى عند مول الحانوت وفي أي سوبر مارشي.

السعودية غير هادي عشر سنوات كانت كتدور فيها هيئة الأمر بالمعروف والنهي عن المنكر لي لقاتو كيدور بشي كيطار ولا ألة موسيقية كتهرسها ليه فوق راسو، وهاد العام دارو سهرة ديال ميطاليكا في الرياض وحاليا طلقو الطاسة للديبلوماسيين الأجانب على غرار هاميلتون الصاحب ديال مدن الملح، حنا بلاد باب الرب في مراكش أي باب الروج ومع ذلك باقي واحد التشدد في القوانين من ناحية الشراب مبالغ فيه وماغاديش مع نمط العيش ورغبات الشعب وممارساته اليومية، وكذلك ماغاديش مع تطلعاتنا كبلاد منفتحة تسعى لجلب عدد كبير من السياح وتقدر تنافس ولو غير بلاد صغيرة في أوروبا، علما راه عندنا بلاد عجيبة فيها واحد التنوع مكاين حتى فشي بلاصة ومابعيدش في المسافة، راه يمكن تفيق الصباح في الرباط حدا البحر جوج ساعات ونص تلقاك في آزرو وسط الغابات والجبال مغطية بالثلج حتى لميدلت تزيد عليها تلاتة ديالساعات خرى تبات في الصحرا ديال أرفود قرب وحدين من أعلى الكثبان الرملية في المنطقة هادشي لي كيحماقو عليه السياح والمغامرين وعشاق السفر، ولكن رفقة الشراب والانفتاح ومايبقاش الأمر حكر على الأماكن المصنفة.

حنا بلاد مافيهاش مكة أو قبلة دينية لشي دين أو طائفة معينة باش يجيو ليها الحجاج والزوار من العالم، حنا بلاد عندها تاريخ وفيها طبيعة واعرة مبنية على الإختلافات والتنوع لي تقدر تزور وتشوف، ولا تكتمل هاد المتعة إلا بأننا نتحولوا لبلاد سياحي متحرر مية فالمية من القوانين لي خلاها المستعمر ومعندها علاقة بالدين، جوج راشدين باغين يشدو أوطيل لاش خاصهم يشدو كل واحد شومبر بوحدو مالنا في طورا بورا، الواحد ريح في مطعم كوموندا ألذ طاجين في العالم إلى بغا يعزز من المذاق ديالو بشي كاس ديال الروج مغربي تزرع وتخمر وتعصر في المغرب ماغاديش يلقى وخاصو يكون في فندق مصنف، راه لامنطقي هاد المنع نهائيا وعائق كبير ومانع اقتصادي لبزاف ديال المقاولات الصغرى لي دايرينها أسر وشباب مغاربة، راه فرق كبير بين يشرب عندك واحد قرعة ابتداء من مية وعشرين درهم وياكل معاها ويمشي فرحان وبين يشرب كاس ديال أتاي بعشرة دراهم ويمشي فيه فقر الدم.