كود – عثمان الشرقي //
شحال من مرة كنشوفو شي فيلم كيعطي فيه المخرج ملامح باينة وقاصحة، بحال الجبهة العريضة و العينين الغارقين.
هاد الفكرة ديال أن شكل بنادم كيدل على تصرفاتو ماشي جديدة، ولكن هي الأساس واحد النظرية شهيرة فـعلم الإجرام ديال الطبيب الشرعي سيزار لومبروزو، اللّي حاول يثبت أن الإجرام عندو علاقة مباشرة بالوراثة والشكل الخارجي ديال الجسم.
لومبروزو، من بعد ما شَرّح بزاف ديال الجثث د المجرمين فالحبس، اعتبر بلي هاد الناس ما تطوروش جينيا بحال البشر الآخرين، حيث باقيين هازين صفات جسدية ونفسية كتشبه للإنسان البدائي، هادشي اللي كخليهم يميلو للعنف والسرقة بلا ما يقدروا يتحكمو فالمشاعر ديالهم.
فالقرآن 19 حط لومبروزو قائمة ديال الصفات الجسدية اللي كتميز المجرمين، بحال الفك السفلي العريض والخارج لـقدام، النيف العريض وليدين اللي طوال بزاف كيشبهو لقردة الشامبانزي.
وزاد قسمهم على حساب نوع الجريمة، مني كتب بلي الشفار غالبا عندو عينين ديما كيتحركو ويدين خفاف، اما القاتل كتميزو شوفة ثابثة وعينين حمرين وقدرة غريبة على تحمل الألم، داكشي علاش كيميلو يديرو الوشام.
مع التطور ديال الطب والجينات وعلم الاجتماع، العلماء لقاو بلي هاد الهضرة ماشي علمية وفيها عيوب خطيرة. أولاً، حيت مبنية على أفكار عنصرية كتربط بين ملامح بعض الشعوب والإجرام، وثانياً، حيت لومبروزو ركز غير على العظم واللحم ونسى باللي الفقر، الجهل، التربية، والظروف الاجتماعية القاسية هما الأسباب الحقيقية اللي كتخلي بنادم ينحرف.
اليوم، علم الإجرام الحديث كيرفض الأفكار ديال لومبروزو وكيأكد باللي “المظاهر خداعة”؛ فالمجرمين الخطيرين ديال هاد العصر (بحال النصابين الكبار) كيبانو أنيقين.
وخا أن نظريتو غالطة، كيتعتبر لومبروزو هو “أب علم الإجرام الحديث”، حيت كان هو أول واحد فكر يدرس الشخص المجرم بيدو ويقلب على دوافع الجريمة، ماشي غير يعاقب على الفعل وصافي.