كود سبور//

خرج الدولي المغربي أشرف حكيمي على السكات ديالو، بعدما ادعت الطليقة ديالو الممثلة الإسبانية من أصول تونسية هبة أبوك أنه خانها، وأنها سمحت له شحال من مرة وبلي الخيانة كتقتل الحب وهذا سبب فراقها منو.

النجم المغربي أشرف حكيمي لاعب باريس سان جرمان الفرنسي خرج اليوم الخميس، وحط سطوري على أنستغرام قال فيه: “اللي كتشوفو كتأمن بنصو.. واللي ما كتشوفوش ما كتأمنش بيه”، وهذا كيجي كرد من ولد حي خيطافي فمدريد على الطليقة ديالو وكيقول للرأي العام ما تيقش شي حاجة ما شفتيهاش.

وكانت هبة أبوك خلال المرور ديالها فبودكاست مع vicky martin، هضرت على حياتها الشخصية وأكدت أنها متحفظة بخصوصها بزاف، وهي حرة ومن حقها باش ما تخليش اللي جا يهضر فيها، ولكن كشفت أنها ما كانتش عايشة مزيان وقالت: “عشت أسوء عام فحياتي وسالا هذا الشي، دابا أنا مزيانة، ووقعو بزاف ديال الحوايج العام اللي فات وبزاف ديال الحوايج تبدلو”.

وكملت طليقة أشرف حكيمي: “كيفاش تقدر تخرج من هذا الشي؟ خاصك تفكر بزاف وتراجع هذا الشي مع راسك ومعه حتى هو، الخاينة كتقتل الحب، نقدر ندوز الخيانة الزوجية ونسامح وسامحت شحال من مرة، حنا كنغلطو ولكن المسامحة شي حاجة صعيبة وخاصك تورك على راسك، دوزت وقت صعيب، وكنت عيانة وكان الفراق قرار صعيب حيث درت كلشي على قبل عائلتي وعائلتي تقسمت”.