كود سبور//

تواصل الماركات العالمية التهافت على اللاعبين الدوليين المغاربة، ونجحت شركة “أندر آرمور” الأمريكية المتخصصة فالملابس والأمتعة الرياضية فتوقيع عقد إشهاري مع النجم المغربي أشرف حكيمي لاعب باريس سان جرمان الفرنسي واللي هو أحسن ظهير أيمن فالعالم، وتفوقت على أديداس الألمانية اللي كانت موقعة معه السنوات الماضية.

وسالا أشرف حكيمي العقد ديالو مع أديداس ووقع عقد جديد مع أندر آرمور، وهذا الشي اليوم الخميس، وجا هذا التوقيع باش النجم المغربي يكون الوجه التجاري والإشهاري لهاد الشركة الأمريكية اللي غادية وكاتكبر فسوق الملابس والأمتعة الرياضية العالمي، وطبعا راه اختيارها للنجم المغربي مول 26 عام، جا بعد التألق ديالو سنوات هادي فالبطولات الأوروبية المختلفة ومع أندية كبيرة أوروبيا بحال ريال مدريد الإسباني وبروسيا دورتموند الألماني وأنتر ميلان الإيطالي ودابا مع باريس سان جرمان الفرنسي، اللي متصدر معه دابا الدوري الفرنسي وتأهل معه إلى ربع نهائي دوري أبطال أوروبا.

وتعتبر هذه الخطوة استراتيجية بالنسبة لشركة Under Armour، اللي هدفها هو تعزيز حضورها فالسوق الفرنسية، وتستغل شعبية حكيمي، اللي يعتبر من الرموز العالمية لكرة القدم ملي حقق التأهل التاريخي مع المغرب إلى كأس العالم 2022 في قطر.

أشرف حكيمي عبر فتصريح له على الفرحة ديالو بالتوقيع مع Under Armour وقال: “أنا متحمس بزاف حيث وليت مع Under Armour، وهي العلامة التجارية اللي كاتصمم منتجات ممتازة وجات مواتية قيمتي”.