گود سبور//

عبرو لاعبين المنتخب المغربي للفوتاسال على الفرحة ديالهم، حيث بداو كوب دافريك مزيان برباح على منتخب أنگولا فأول ماتش من الگروب الأول، وأكدوا أن المباراة كانت صعبة ولكن بفضل دعم الجمهور قدرو يخرجو رابحين.

وقال حمزة بويوزان لاعب المنتخب المغربي للفوتسال فتصريح لموقع “گود” بعدما ربح المغرب أنگولا بـ5 لجوج: “الماتش الأول ديما صعيب وقدرنا نربحو، ومنتخب أنگولا فريق كبير، مزال ما تأهلانش وباقي لنا 2 ماتشات، وحنا واجدين لهم”.

سفيان الشعراوي نجم الماتش بعدما ضرب هاتريك، حتى هو قال: “ربحنا ودرنا داكشي اللي بغا المدرب والماتش الأول ديما صعيب، والدراري معاونيني، واليوم ماركيت أنا وغدا يماركي المسرار وبعدو بماركي البقالي، والمهم أننا فريق واحد”.

ووضح أنس العيان وقال: “الماتش بدا صعيب وحنا كنا زربانين باغيين نماركيو، ورجعنا فالنتيجة وهذا الشي مزيان يوقع لينا دابا، باش نركزو وكوب دافريك بطولة صعيبة ونتمناو الماتشات الجايين يتحسن مستوانا”.

أما كابيتان المنتخب المغربي ادريس الرايس الفني، قال: “قدرنا نربحو الماتش الأول اللي ما كانش ساهل ضد منتخب أونگولا اللي عندو تقنيات عالية، وقدرنا بدعم الجمهور نبقاو مركزين فالماتش ونقلبو النتيجة وكنطالب الجمهور المغربي يجي الماتشات الجايين باش نخليو الكاس فالمغرب”.