كود سبور//

أكدو لاعبين المنتخب المغربي لكرة القدم داخل القاعة، أنهم واجدين باش يلعبو دومي فينال كوب دافريك ضد منتخب ليبيا اليوم الجمعة فالرباط، ومتحفزين حيث الجمهور غيجي يشجعهم ويعاونهم باش يربحو ويتأهلو للفينال ديال كأس إفريقيا ولكأس العالم.

وهضر أنس العيان لاعب المنتخب المغربي للفوتسال قبل ماتش الأسود وليبيا، وقال: “هاد الماتش بالنسبة لنا فينال، وأهم ماتش فالكوب دافريك هو هذا وكنطلبو من الجمهور المغربي يدعمنا بالأجواء اللي كيدير ملي بدات البطولة وكيشجعونا وكيعطيونا الثقة وجمهورنا هو أحسن جمهور ديال الفوتسال فالعالم”.

وكمل العيان: “غيكون خير، حنا خدامين وكنديرو الأسباب باش الماتش يدوز  مزيان، وعندنا بزاف ديال المعلومات على منتخب ليبيا، ولعبنا ضدهم شحال من مرة، وكيقول لينا المدرب هشام الدكيك أن الدومي فينال ماتش خايب وصعيب فكل تورنوا وهو المهم”.

سفيان بوريط لاعب المنتخب المغربي لكرة القدم داخل القاعة، حتى هو هضر على نصف النهائي ضد ليبيا، وقال: “ديما ماتش الدومي فينال هو أهم ماتش فكل بطولة، وبالنسبة لنا هاد الماتش هو فينال ماشي دومي فينال، حيث منو غنتأهلو لكأس العالم، وحنا وجدنا كلشي وقرينا الخصم وديما ديرين اجتماعات فلوطيل وكنحاولو نعرفو نقاط القوة والضعف ديالهم باش ما نتفاجؤش بهم”.

ووضح بواسط: “بالنسبة للمنتخب الليبي عندو تاريخ فكورة القدم داخل الصالات،  وهو منتخب محترم وديما الماتشات ضد بحال هاد المنتخبات كتكون صعيبة ولعبنا ضدهم فـ2016 وكانو فأوج العطاء ديالهم هذاك الوقت يمكن حنا كنا محگورين هديك الساعة، حيث اللاعبين كانو باقيين صغار وكانت أول تجربة لنا كمنتخب وتوفقنا، وهاداك الماتش كان فالگروبات، وكيختالف على هاد الماتش ديال الدومي فينال، نتمناو نتوفقو وحنا سوا اللاعبين أو المدرب راه حتى واحد ما مخلي من جهدو وما يكون غير الخير”.

وزاد سفيان بوريط: “الجمهور عندو دور كبير خصوصا وأننا حنا اللي مستضفين البطولة وخاص الجماهير المغربية تعاونا بزاف والماتش غيتلعب بگيشي فيرمي حيث التيكي سالاو وهذا حافز لنا حيث القاعة غتكون عامرة بالجماهير وباغيين نفرحوهم ونتأهلو للفينال”.