كود سبور- طشقند//
أكدو لاعبين المنتخب الوطني المغربي لكرة القدم داخل القاعة أنهم واجدين باش يلعبو مونديال الفوتسال، ومستعدين لمواجهة منتخب تاجيكستان برسم الجولة الأولى من البطولة المقامة فأوزبكستان، وأنهم باغيين يهديو اللقب للمغرب.
وقال أنس الدحني لاعب المنتخب المغرب للفوتسال، فتصريح لـ”گود” قبل ماتش تاجيكستان: “اخدمنا مزيان، والماتش الأول فكأس العالم ديما كايدوز صعيب ولكن حنا باغيين نديرو نتائج إيجابية”.
وكمل الدحني وقال: “الأجواء فالگروب زوينة والدراري مساندين بعضهم وواحد كايشجع واحد، سوى اللاعبين ديال الخبرة أو الشباب ومتعاونين وحتى المدرب هشام الدگيگ معاونا نتمناو نديرو نتيجة إيجابية”.
أما هداف المنتخب المغربي سفيان الشعراوي، قال: “حنا خدامين على هذا المونديال من كأس العالم اللي فات، وكنعرفو شنو كانديرو وبغينا نديرو شي حاجة احسن من المرة اللي فاتت وبغينا نهديو الكأس للمغرب”.
