كود سبور//
أكدو لاعبين المنتخب المغربي لكرة القدم داخل القاعة، أن الاستعدادات لمونديال الفوتسال فأوزباكستان، كاتدوز مزيان وأنهم باغيين ينافسو على اللقب.
وهضر سفيان الشعراوي لاعب المنتخب المغربي فتصريح للموقع الرسمي للجامعة الملكية المغربية لكرة القدم، وقال: “الاستعدادات كاتدوز مزيان وحنا خدامين كانوجدو لكل شي، واللاعبين مزيانين دهنيا وبدنيا والأجواء داخل المنتخب مزيانة وحنا عائلة وكانصحو بعضنا وكانتفرجو فالماتشات وكانهضرو على كل شي ونتمناو كأس العالم تدوز مزيان”.
الدولي المغربي إسماعيل امزال، حتى هو قال فالتصريح ديالو: “الأجواء عائلية مع الگروب والطاقم ديالنا وخدمنا جميع النقاط اللي غاتخلينا نلعبو على اللقب، وكانشكر الجامعة الملكية المغربية لكرة القدم على الظروف اللي وفرت لنا وأننا جينا لأوزباكستان قبل من 10 ايام على انطلاق المونديال، وغادي نلعبو ماتش بماتش وكل ماتش يعتبر فينال وما يكون غير الخير وكانتمنى الجمهور المغربي يشجعنا”.
