وكالات//

تعطات للبريطاني جاكوب ريغز، اللي عندو 36 عام وساكن فبيكسلي بلندن، فيزا 858 ديال الابتكار الدائم فأستراليا، وهي من أندر الفيزات اللي كيتعطاو غالباً غير للناس اللي حاصلين على جائزة نوبل ولا أبطال أولمبيين. هاد الشي جا من بعد ما قدر يكتاشف ثغرة إلكترونية فسيستيم ديال الحكومة الأسترالية.

ريغز خدام فمجال الاختراق الأخلاقي، وقدر يحدّد هاد الثغرة الأمنية غير فشي ساعات من دارو، وهاد الشي خلا وزارة الشؤون الخارجية والتجارة الأسترالية تشيد بالمهارات ديالو وتعتبر أنه دار خطوة مهمة فحماية البنية الرقمية ديال الدولة.

من بعد هاد الإنجاز، خدا ريغز الإقامة الدائمة وكيحضّر باش ينتاقل لسيدني باش يخدم فمجال الدفاع السيبراني، حيث راه دابا شاد منصب المدير العالمي لأمن المعلومات فواحد الشركة الكبيرة.

هاد الحدث جا فواحد الوقت اللي كتواجه فيه أستراليا تصاعد فالهجمات والتهديدات السيبرانية، حيث سجلات السلطات كثر من 1200 حادثة إلكترونية هاد العام، بزيادة 11% مقارنة مع العام اللي فات، وسط تحذيرات رسمية من مخاطر التجسس والجريمة الإلكترونية على الخدمات الحيوية.