كود – Donostitik //

شد البوليس فإسبانيا مؤخرا مغربي مباشرة من بعد ما دخل للتراب الإسباني، حيث كان روشيرشي بعدما خلا ولاد فإسبانيا فالصيف لي فات.

الموقع الإخباري الإسباني Donostitik، قال ان القضية متعلقة بأستاذ ديال علوم الحياة والأرض ، اللي دخل هادي شهورا لإسبانيا مع جوج من ولادو القاصرين، باش يدخلهم لمراكز الحماية الاجتماعية الخاصة بالقاصرين و يعيشو تحت رعاية الدولة الإسبانية، فمدينة بيلباو.

التحقيقات اللي دارها البوليس بينات أن المعني بالأمر دخل هاد المرة لإسبانيا من ميناء الخزيرات  (Algeciras)، قبل مايتشد بتهمة الأهمال ، قبل ما يتم يتطلق سراحو من بعد مورا ما تعهد باش يرجع المغرب و معاه ولادو ويتكفل بهم

هاد الواقعة ماشي حالة بوحدها، حيث كاين عدد كبير ديال الحالات فإسبانيا والدول الأوروبية كيستعملوها بعض الآباء من المغرب وحتى الامهات  مني  كيسمحو فولادهم  بالقاصرين باش يعيشو على حساب الدول أو باش يستافدو من تسهيلات قانونية أو اجتماعية.

وهاد الشي كيسبب ضغط على مراكز الحماية الاجتماعية ، وكيطرح سؤال كبير على الأخلاق والمسؤولية ديال أولياء الأمور  تجاه ولادهم ،بعض المختصين كينبهو  بأن هاد التصرفات كتأثر على الصحة النفسية ديال دراري ، حيث كيبقاو كيحسو  بالتخلي والإهمال، وهاد الشي كيخليهم عرضة لمشاكل اجتماعية ونفسية طويلة من بعد.