كود الناظور //

عرفات مدينة الناظور اليوم الخميس، احتجاجات كبيرة نظماتها تنسيقية أساتذة المتعاقدين فالمدينة، ضد الاعتقالات والأحكام اللي خرجات ضد 40 من الزملاء ديالهم، شاركو فمسيرة سابقة تنظمات فالرباط.

الوقفة ترفعات فيها شعارات، كتسنتكر الأحكام فحق أطر تابعين لمختلف الأكاديميات على المستوى الوطني، بحيث طالب المحتجين من وزارة التربية الوطنية تكَلس لطاولة الحوار، باش يلقاو ليهوم حل ويدمجوهوم بشكل مباشر فالوظيفة العمومية.

الأحكام المنطوقة ضد الأساتذة المتعاقدين، قالو عليها المحتجين بللي ماغاتوقفهومش فمواصلة الاحتجاجات، حتى يتم الوصول معاهم لحل يرضي جميع الأطراف المتداخلة فالملف ديالهم، أهمها الدمج المباشر فأسلاك الوظيفة العمومية، حسبهم.