كود بني ملال//

أساتذة التعليم لولاني فعدد من المدن المغربية خرجو البوم اليوم الاثنين فخطوة احتجاجية جديدة، قدّام مقرات الأكاديميات الجهوية للتربية والتكوين. فهاد الوقفات، رفعو شعارات كيطالبو فيها بالإدماج فأسلاك الوظيفة العمومية، وتطبيق قانون الإطار 51.17، وسدو الباب قدّام ما سموه بـ”الوصاية والاستغلال” اللي كيمارسوه الجمعيات المشغّلة.

المصادر اللي من التنسيقيات الجهوية قالت باللي السلطات فبني ملال منعات المسيرة اللي كانو الأساتذة ناويين يديروها من قدّام الأكاديمية، ولكن فمدن بحال الرباط، وجدة وفاس، كان الحضور كبير بزاف، والأساتذة شدّو فشعارات كيطالبو فيها بالتصعيد إلا ما استجابتش الحكومة لمطالبهم، واعتابرو هاد الوقفة “معركة نضالية حاسمة”.

الأساتذة المحتجين قالو أن هاد التحرك جا من بعد سنوات ديال الانتظار والتهميش، بسبب الوضعية الهشة اللي عايشين فيها، بلا استقرار مهني ولا اجتماعي. ورفعو شعارات بحال “الكرامة أولا والإدماج حق مشروع”، وأكدو أنهم غادي يستمرو فالنضال بجميع الطرق القانونية حتى يتحققو مطالبهم كاملة.

الأساتذة هضرو على “ظروف الخدمة الصعيبة” اللي فيها “الهشاشة وغياب الحقوق والأمن الاجتماعي”، ونددو بما سموه “الاستغلال الممنهج من طرف الجمعيات الوسيطة”. وحذرو أن استمرار التجاهل ممكن يخليهم يديرو خطوات احتجاجية أقوى، مؤكدين أن الإدماج هو الطريق لضمان جودة التعليم الأولي واستقرار العاملين فيه.