كود – بني ملال //

استقبل السبيطار الإقليمي ديال أزيلال، نهار الجمعة 12 يونيو الجاري، شاب عندو 19 عام من جماعة واولى، من بعدما تعرض لقرصة ديال عقرب. وتم التعامل به حسب البروتوكول العلاجي المعتمد من طرف وزارة الصحة والحماية الاجتماعية، الشي لي خلا حالتو الصحية تستقر من بعد ما خدا العلاجات الضرورية.

وحسب معطيات المندوبية الإقليمية للصحة بأزيلال، تسجلات فشهر يونيو 34 قرصة ديال العقارب وجوج عضات ديال لفاعي ، مقابل 45 حالة قرصاتهم عقرب فشهر ماي ، وهكا وصل المجموع فشهرين لـ81 حالة .

وأكدات المندوبية باللي جميع الحالات لي وصلات للسبيطار خداو العلاجات اللازمة وخرجو من السبيطار مورا ما ولاو لاباس ، بلا ما تتسجل حتى حالة وفاة.

ومع طلعات الحرارة ديال الصيف، دعات المندوبية المواطنين يردو البال ، ويتفاداو يدخلو يديهم فالحفاري والغيران ، وما يگلسوش حدّا الحجر ولا الگازو ، مع ضرورة يقلبو صبابطهم وحوايجهم وفراشهم قبل الاستعمال، خصوصاً فالمناطق القروية و الفلاحية.