گود سبور//

تفكت أزمة التقرير المالي اللي تفرگعت فالرجاء الرياضي بين المكتب المديري السابق برئاسة عبد الله بيرواين والمكتب المسير الحالي برئاسة جواد الزيات، بعدما خلقت جدل كبير مؤخرا، لدرجة أن بيرواين خرج كايتهم مكتب الزيات بأنه خرق القانون.

وكشفت مصادر رجاوية لـ”گود”، أن المكاتب المسيرة بثلاثة، (المكتبين السابقين ديال عادل هالا وعبد الله بيرواين والمكتب الحالي ديال جواد الزيات) اتفقو على تجاوز الأزمة وحل المشكل ديال 3 المليار و400 اللي تضمنها التقرير المالي فعهد الرئيسين السابقين عبد الله بيرواين وعادل هالا.

ووضحت نفس المصادر، أن كل من الرئيسين السابقين عادل هالا وعبد الله بيرواين وأمين المال د المكتب المديري الحالي سفيان أبوكاض گلسو وحيدو المبلغ المذكور اللي كان تضمن فالتقرير المالي د المكتبين السابقين باش يدوز فالجمع العام التكميلي، قبل ما يتم تأجيل الجمع العام بسبب اعتراض بيرواين وهالا عليه، حيث اعتبروه ما كاينش فالتقرير ديالهم، واستغربو من أن المكتب الحالي زادو لهم فالتقرير المالي ديالهم وبلاما يتشاورو معهم.

وقرر المكتب الحالي برئاسة رئيس جواد الزيات الاستجابة لملاحظات كل من بيرواين وهالا، ويحيدو هاداك المبلغ اللي كان نقطة خلاف قوية من التقرير المالي، على أن يعرض هذا التقرير خلال الجمع العام التكميلي على المنخطرين باش يصوتو عليه في انتظار تحديد موعد جديد لهاد الجمع العام، فالوقت اللي أكدت فيه مصادر رجاوية أن العملية اللي دار المكتب ديال جواد الزيات راه قانونية وما فيهاش خرق قانوني وأن هذا الرقم هو خاص بالمخاطر المالية المحتملة، باش يقدرو يغطيو أي مشكل وقع ويفكوه، ولكن بيرواين خاف على راسو ومن حقو يرفض.