كود سبور//

كتعيش الاندية المغربية وضع اقتصادي ومالي صعيب، وهذا الشي راجع لعدد من الاسباب منها مشاكل تسييرية تراكمت لسنوات وعدد من التيرانات اللي تسدو للإصلاحات، حيث كان الحضور ديال الجمهور على الاقل كاينفس المسيرين مرة مرة من الحانب المالي، واللي زاد عمق المشكل دابا هو ان الاندية مازال ما توصلت بمنح ترتيب البطولة الاحترافية.

وحسب مصادر مطلعة، فالعصبة مازال ما صرفت منح ترتيب البطولة الاحترافية للموسم الرياضي 2023-2024، وعلى راس المتضررين من هذا الشي الرجاء الرياضي بطل الثنائية البطولة وكاس العرش، واللي غايمثل المغرب الموسم الجاي فدوري ابطال افريقيا، ولكن فبلاصة ما الفريق يبدا يوجد وهو مرتاح للشومبيونزليگ، فالمسؤولين ديالو ملي سالا الموسم الماضي وهما كايحاولو يقلبو كيفاش يحلو مشكل المستحقات مع اللاعبين اللي كايطالبو برزقهم وهذا حقهم المشروع.

وبالمقابل وفبلاصة ما تكون العصبة الاحترافية محفزة للاندية ومساندة لها وخصوصا من الجانب المالي، فهي مازال ما صرفت المنح ديال الترتيب لفرق البطولة ومن بينها منحة 600 مليون سنتيم المخصصة لبطل المغرب، اللي محتاجينها الرجاء الرياضي باش يخلصو جزء من مستحقات اللاعبين اللي عدد منهم رسل إنذار للنادي للمطالبة بالمستحقات ديالو او اللجوء إلى اللجهات القانونية المختصة، الشي اللي كايعني ان الفريق مهدد ويقدرو يمشيو له لاعبين اساسيين سوا بفسخ العقود حيث ما خداوش مستحقاتهم او انهم يوافقو على عروض من الخليج او غيرها من البطولة باش يضمنو انهم ياخذو مستحقاتهم فالوقت.

نفس المصادر، وضحت ان ادارة الرجاء الرياضي طايحين دابا فمشكل كبير، حيث كانو مواعدين اللاعبين انهم غايعطيوهم اجزاء مهمة من مستحقاتهم من منحة البطولة، ولكن تعطلت عليهم المنحة ولقاو ريوسهم فمواجهة مع اللاعبين اللي كاين فيهم اللي ما صابرش وباغي رزقو حيث عندو التزامات شخصية، وهذا الشي كامل ماشي فمصلحة الفريق وممكن يؤثر بشكل سلبي على الاستعدادات ديالو للشومبيونزليگ اللي غايمثل فيها المغرب الموسم الجاي.