كود – وكالات///

سدّات طهران الطواليطات العمومية ديال المدينة، فإطار إجراءات دارتها الحكومة بسبب أزمة الماء اللي ولات كتزاد سوء نهار على نهار، حسب ما قالتو وكالتي “ديدبان إيران” و”شرق” الإخباريتين.

وانتقدت وكالة “ديدبان إيران” الحكومة على هاد القرار، وقالت باللي مايمكنش يتحرمو الناس من حاجة ضرورية بحال هادي.

رغم هادشي، ما خرجاتش إدارة مدينة طهران بأي توضيح رسمي، ولكن بزاف ديال الناس اللي كيقولو بأنهم شافو بعينيهم أن بزاف ديال الطواليطات تسدّو، حتى فمحطات المترو.

وحسب التقديرات، كاينين تقريبا 20 ألف طواليط عمومي فمنطقة طهران الكبرى.

وهاد الإجراء جا فواحد الوقت اللي فيه أزمة الماء والضو ولات مشكل كبير عند الإيرانيين، بحيث كاينين أحياء كتقطع عليهم الماء حتى لـ48 ساعة، فطهران وأكثر من 50 مدينة أخرى.

وفوق هاد الشي، كيتزاد الطين بلة بانقطاع الضو لساعات طوال، الشي اللي كيخلي المكيفات ماخدامينش، رغم أن درجات الحرارة كتوصل لما بين 40 و50 درجة.