كود الرباط//

روينة كبيرة فكليات الطب والصيدلة فالمغرب، أكبر إضراب عرفو شي قطاع فالمغرب، هو هاد إضراب طلبة الطب لي فايت 9 شهور، عام مشا، ورافضين أي صيغة جديدة للتوافق واخا جاتهم صيغة مزيانة من مؤسسة الوسيط، لكن رافضينها حيث متمسكين بمطلب الدراسة ف7 سنوات بلاصت ست سنوات لي قررت الدولة.

الجانب الخفي فهاد الإصرار لي دايرين ممثلي طلبة الطب، هو طريقة تمويل إضراباتهم، ميمكنش حركة احتجاجية تبقا صامدة طيلة عام كامل وهي حركة مكونة من طلبة معندهمش مدخول، وهنا من حق أي واحد يتساءل كيفاش كيتمولو ومنين كيجيبو فلوس وو. هنا غانفتحو قوس كبير، هاد ممثلي طلبة الطب والصيدلة عندهم ما يسمى اللجنة الوطنية لطلبة الطب والصيدلة وطب الأسنان كتسير كولشي وتنظم الوقفات والمسيرات الوطنية، عندها حساب بنكي باسم شخص وماشي باسم جمعية، هنا كيتلقاو الفلوس.

على ذكر التمويل، دبا طلقات حملات فالمجموعات الخاصة بالأطباء والطلبة باش يتم دعم مسيرة الأحد فالرباط، عن طريق تمويل الطرونسبور ديال الطلبة باش يمشيو للرباط للاحتجاج على القرار السيادي للدولة ديال تقليص سنوات الدراسة لمنع هجرة الأطباء إلى الخارج.

كانت حملة قوية من الإسلاميين باش طلبة الطب يبقاو فالاحتجاجات ويهزمو الحكومة، حيث بالنسبة ليهم هادو وقود لمعاركهم ضد الدولة، ولكن للي غريب هاد المرة هو التحالف بين الإسلاميين وصحاب الفلوس للي باغين ولادهم يكملو القرايا ف فرنسا باش من بعد يديرو كلينيك فالمغرب ويگزرو فالمغاربة، وزيد عليهم الگزارة فالقطاع الخاص أطباء ملايرية داعمين احتجاجات الطلبة.

كاين تحالف بين الملايرية و”الگزارة” فالطب الخاص مع الخوانجية ضد “سيادة” التكوين الطبي المغربي وضد يبقاو الأطباء فالمغرب كيعالجو خوتهم فطاطا واولول وزحيليكة واملشيل وغيرها من المناطق لي مخداتش حقها لا فالتنمية لا فالصحة ولا فوالو. فسياق كتعيش فيه الاحزاب السياسية صراعات على المناصب والمكاسب ومخلية المؤثرين واللحايا يأثرو فهاد الملف بصورة خايبا فالسوشل ميديا.

كاين عصيان كبير ضد القرار السيادي للدولة، المتعلق بتقليص سنوات الدراسة مع تكثيف سوايع التداريب والتكوين يعني الخدمة وتمارة باش يخرج طبيب مقاد.

يشار بلي اللجنة الوطنية لطلبة الطب دازت لمرحلة التهديد بالشارع، وقررت إنزال وطني ختارت ليه شعار ” شباب المغرب وأطره من أجل وضع صحي وحقوقي أفضل” غايكون نهار السبت. دخلو الوضع الحقوقي مع الوضع الصحي. واش فعلا هادو كيهمم وضع حقوق الإنسان فبلادنا، موحال، حيث كون كان كيهمهم كون شفناهم ف احتجاجات ضد الاعتقالات للي كانت ضد نشطاء الحراكات الاحتجاجية أو ضد صحفيين أو ضد مدونيين. لا عمرنا شفناهم هضرو ولا حركو لسانهم.

هاد الفئة كتهضر على حقوق الإنسان، ماشي حيث همها ولا قلبها ولا روحها مع ثقافة الحقوق والحريات، لا أبدا اليوم كيهضر على الحقوق حيث تقاست مصالحهم ومصالح اللوبي للي كيحركهم، كولشي عارف بلي أطباء ملايرية ضد تقليص سنوات الدراسة، هذا هو صلب الموضوع وماشي ضعف تكوين وشعارات كاذبة ديال ’’بغينا الصحة ديال المغاربة وو” كون بغيتو صحة المغاربة وكدافعو عليها كون مشيتو لأولوز ولا طاطا تخدمو ولكن لا حيث تما مافيهاش الحبة.

يلا كان شي نقاش وطني معقول، خصو يكون اليوم على هاد الجيل ديال أطباء الغد، واش مع مصلحة البلاد ولا ضدها، واش مستعدة الدولة تضحي بهاد الخريجين ديال هاد العام وتزير السمطة وتعلن سنة بيضاء ليهم وللي بغا يقرا مرحبا وللي مبغاش الباب الحباب.

علاش كنقولو هاد الهضرة، حيث فعلا البلاد وصلت للباب المسدود، اعترافات خطيرة من وزيري التعليم العالي والصحة فالبرلمان، قالو فلجنة بمجلس النواب حضرو فيها رؤساء فرق الأغلبية والمعارضة وعمداء الكليات، بلي الحكومة مشات كتقلب على أطباء أجانب يجيو يخدمو فالمغرب مالقاوش، حيث كل دولة دايرا حصار على مواردها البشرية، خصوصا من مور كوفيد كولشي ساد على المخزون ديالو سواء فالموارد البشرية أو الأدوية أو التقنيات أو المنتوجات الفلاحية. وهادشي لي هضر عليه سيدنا وعطا أوامر للحكومة باش دير مخزون استراتيجي فالدوا والمواد الغذائية والصناعية وو. وحتى الموارد البشرية اليوم خاص يكون عندنا خزان.