كود الرباط//
علمت “گود” من مصدر مطلع أن نزار بركة، الأمين العام لحزب الاستقلال، باقي كيواصل سياسة الغموض ضد قيادات حزبه بخصوص تشكيلة اللجنة التنفيدية للي تعطل فيها هادي كثر من اربعة اشهر على محطة المؤتمر الوطني لي طلع فيه بركة امين عام.
بركة، حسب مصادر استقلالية، حتى هو داير سياسة بنت الباشا فالبام، بحيث هو الوحيد لي كيسير حزب بلا لجنة تنفيذية وكيدبر المفاوضات ديال التعديل الحكومي بوحدو، والاكثر من ذلك شي وحدين كيعتبروه حنى هو عندو مع الفوق وسوارت التعديل الحكومي بين يديه وهو للي عارف شكون يحط بلات الوزراء لي غيطيرو باسم حزب الاستقلال. كيشبه ليها فكولشي تقريبا، حتى التواصل كيتخبا بزاف بحالها.
اليوم نشر بركة تدوينة على الفايسبوك كيعلن فيها بلي “في إطار المشاورات المفتوحة مع الهيئات والمنظمات الموازية من أجل تشكيل اللجنة التنفيذية، اجتماع مهم مع رؤساء الروابط المهنية لحزب الاستقلال.
هاد الاجتماع باش مهم يتساءل مصدر قيادي استقلالي عارف خبايا الحزب، بحيث أن كولشي عارف بلي تشكيل اللجنة التنفيذية ميمكنش يتم بدون التوافق مع حمدي ولد الرشيد والنعم ميارة. اي ميمكنش تكون لجنة تنفيذية بالتصويت، خاص ضروري يكون توافق مع تيار الصحراء.
وكشفت مصادر استقلالية في حديثها مع “گود” بلي تدبير بركة للحزب ضعيف ولا يقارن بالفترات السابقة، وحتى حميد شباط حسن منو، بحيث على الاقل كانت الهياكل والتنظيمات خدامين والتواصل كاين وحاضر بقوة عن طريق بنحمزة الملكف بالاعلام. اما دبا كولشي توقف فالحزب، الانشطة تبلوكات والهياكل توقفات، ناهيك عن المشاكل المالية بسبب تأخر الحزب في تنظيم المؤتمر في وقته.
اليوم بركة لي باغي يشد رئاسة الحكومة سنة 2026 وهذا طموحو ومن حقو، ولكن مقدرش يشكل حتى لجنة تنفيذية صغيرة لي هي مسألة تنظيمية صرفة وماشي تدبير حكومي كبير. هو دبا داير مشاورات لا تغني ولا تسمن من جوع لأن هاد الحزب كيتمشا بالتوافق بين التيارات خصوصا ديال الصحراء وسوس وفاس.
