كود ـ وكالات//

فتواخير ديال يوليوز، دخل كثر من 70 ألف واحد لسبتة، من بعد ما انتشرت إشاعة كتقول بلي الحدود بين إسبانيا والمغرب محلولة.

وحسب وكالة الأنباء الإسبانية EFE، وبعد شهورة على بداية الأزمة، تشنعات الأخبار والمعلومات الغالطة اللي كتغذي خطاب الكراهية ضد المهاجرين اللي دخلو للأراضي الإسبانية فداك الوقت.

أزمة سبتة عرفات بالتالي جوج أنواع ديال انتشار التضليل، ميساجات ومنشورات كاذبة فمواقع التواصل الاجتماعي المغربية، مني كانت كتحرش الناس ديريكت باش يتوجهو لسبتة، ومن بعد بانت فالمواقع والمنصات الإسبانية مضامين استغلات هاد الأحداث باش تقوي خطابات عنصرية ومعادية للمهاجرين.

وما بين 30 يوليوز و23 غشت، سجل المرصد الإسباني للعنصرية وكراهية الأجانب (Oberaxe) 78.476 رسالة ومنشور فيها خطاب كراهية، وهو رقم كيضوبل المعدل العادي.

وغير فنهار 30 و31 يوليوز، اللي تزامنو مع الدخول الجماعي للمهاجرين، سجل المرصد 9.590 محتوى من هاد النوع.

المنشورات اللي فيها مضامين عنصرية رصداتها خدمة EFE Verifica فبداية الأزمة، وما كانتش بالضرورة كلها كتروج لكذوب، حيث عدد منها كان كيستعمل صور ديال الحراگة أو بعض المواجهات والأحداث اللي وقعات فسبتة، باش يزيد ينشر خطاب الكراهية فمواقع التواصل.

ولكن من بعد ما رجعات الأغلبية الناس اللي دخلو لسبتة، نقصات الصور والفيديوهات اللي كتتناقل الأحداث، حيت دخلات الإشاعات والأخبار الكاذبة للمعمعة.

وهكا، بدات كتنتاشر فمواقع التواصل منشورات كتنسب للمهاجرين أعمال تخريب ما وقعاتش أصلاً، باستعمال تسجيلات قديمة أو فيديوهات مخدومة، وهي واحد من الأساليب المعروفة فالتضليل العنصري والمعادي للمهاجرين.

ومن بين هاد الحالات، كاينة منشورات كتقول بلي شي حراكة هاجمو كنيسة بطريقة همجية، أو دخلو لسبتة وهما هازين سيوفة. ولكن فالحقيقة، الفيديوهات اللي استعملات فهاد المنشورات كانت مصورة فـكولومبيا.

أما فالايام الأخيرة كانت منشورات على الإنترنت كتهم المهاجرين اللي مازالين فسبتة كياكلو القطوط اللي فالزنقة.

ومن بين الحسابات اللي كانت حاضرة مزيان، كاين حساب RadioGenoa، اللي تأسس من طرف مستخدم إيطالي، ومعروف بنشر مضامين عنصرية ومحتويات معادية لأقليات مختلفة، حسب ما شار ليه المرصد الأوروبي للإعلام الرقمي (EDMO).

هاد الحساب نشر محتويات مرتبطة بسبتة، ووصف الأزمة بأنها “أبوكاليبس”، وقال بلي إسبانيا وأوروبا “تحت الهجوم”، وفعدد من المرات، كانت هاد المنشورات مرفوقة بفيديوهات مخدومة.

وبخطاب قريب من هاد الشي، ركز شعال العوافي والناشط البريطاني اليميني المتطرف تومي روبنسون جزء من النشاط ديالو فمواقع التواصل على الوضع فسبتة، وكان كيخلط بين منشورات حقيقية وأخرى كتكذب.

وفواحد المنشور مرفوق بفيديو قديم، قال روبنسون بلي “موجة ثانية” من المهاجرين دخلات للأراضي ديال سبتة نهار 16 غشت، وهاد المنشور وصل لكثر من نص مليون مشاهدة على منصة X .

الحكومة الإسبانية ووزارة الداخلية المغربية بجوج أكدوا أن التضليل كان واحد من العوامل اللي تداخلات فهاد الأزمة.

وفهاد السياق، أشار المرصد الأوروبي للإعلام الرقمي EDMO فواحد التقرير حديث، إلى أنه ما يمكنش فحالة سبتة تحديد دولة أو جهة وحدة اللي كانت وراء التحريض على عمليات الاقتحام.

التضليل رجع مرة أخرى باش يحرش على محاولة جديدة لدخول الحدود نهار 15 غشت، حسب تحقيق لمؤسسة Maldita.

فداك الوقت، انتشر فواتساب محتوى كيقول بلي الحكومة الإسبانيةأعلنات فتح الحدود غير فداك النهار.

المحاولة الجديدة تحبسات من طرف السلطات المغربية، وتسببات فمواجهات وتدخلات أمنية، وسالات باعتقال 300 واحد من طرف القوات الأمنية المغربية، بسبب محاولات الدخول بطريقة غير قانونية للأراضي الإسبانية.