كود -سبتة//

كلها يلغي بلغاه وسط الحكومة الإسبانية على طريقة التعامل مع أزمة الدخول الجماعي ديال المهاجرين لسبتة ،وزيرة الدفاع، مارغاريتا روبليس، خرجات لأول مرة باش تهضر على القضية، ودافعات بقوة على جهاز المخابرات الإسبانية (CNI)، بعدما كان وزير الداخلية فرناندو غراندي-مارلاسكا كيحمّل نفس الجهاز على مسؤولية عدم التنبؤ بالأحداث.

روبليس، اللي كانت كتزور القاعدة الجوية فسرقسطة، قالت بلي ما باغاش تدخل فـ”صداعات ما كتنفع حتى واحد”، ولكن أكدات أن جهاز المخابرات دار خدمتو، وضافت أن كاينين حتى “أجهزة معلومات” أخرى تابعة البوليس والحرس المدني، ؤ وزارة الداخلية.

وزيرة الدفاع ما وقفاتش عند هاد النقطة، ولكن أكدات أن الجيش الإسباني غادي يبقى فسبتة باش يعاون الحرس المدني، فحماية الحدود لي هي بالأساس من اختصاص وزارة الداخلية ماشي الجيش.

وفالأيام الأخيرة، تداولات وسائل الإعلام الإسبانية أخبار كتقول بلي المخابرات كانت رسلات “تحذيرات” قبل الأزمة، ولكن ما كاين حتى دليل على انه كاين تقرير رسمي كيتوقع دخول ديال عشرات الآلاف لسبتة كتقول الجهات الرسمية.

وكان وزير الداخلية الإسباني، نفا بلي كاينة معلومات استخباراتية كتتوقع هاد التحرك الجماعي، الشي لي خلا وزيرة الدفاع توضح أن المسؤولية ماشي غير فجهة واحدة.