كود الفنيدق//

الشوهة ديال الهروب الكبير اللي كان الفنيدق المسرح ديالها فالويكاند كتساءل برامج التشغيل الحكومية. ملي تعين يونس السكوري فالمنصب ديالو فهاذ الوزارة مدار حتا نقلة نوعية فهاذ القطاع الاجتماعي المهم.

وزارة التشغيل اللي تعين فيها السكوري زعما باعتباره كفاءة وداكشي واحدة من القطاعات اللي مهمة وكتساهم في خلق الشغل بإجراءات ومبادرات مؤسساتية كتعتابر فهاذ الولاية من النقاط السوداء والقطاعات المشلولة فالحكومة.
الأرقام الرسمية كتأكد ارتفاع معدلات البطالة، وكاين أرقام تتحدث عن فقدان مناصب الشغل وإفلاس الشركات. آش دار الوزير على القطاع لا شيء عملي حتا الساعة.
واخا رئيس الحكومة قدم للوزير السكوري أكبر خدمة ملي عبأ عدة قطاعات وزارية باش يوفروا الدعم لبرنامج انا مقاول وتوفرات الأرضية والتمويلات ودارت الانطلاقة ومن تما لدابا مازال ذاك البرنامج مجرد مشروع فالوقت اللي لبلاد محتاجة فرص الشغل.
كان من المتوقع يشغل برنامج انا مقاول 100 شاب. علاش وقف خاص الوزير يجاوبنا.
هاذ الالاف ديال الشباب اللي باغي يحرك لأوربا ملي كتسولو علاش باغي تحرك كيقولك ملقيناش الخدمة، بحال اللي قاري بحال اللي خارج من التكوين المهني بحال اللي مقاريش.

هنا خاص الوزير السكوري يقدم الجواب ديالو على اشنو دار باش يحفز سوق الشغل، و اشنو هي الحصيلة ديالو فمنتصف الولاية الحكومية، والمشاريع اللي خدامة عليها الوزارة ديالو.

الوزير السكوري نجح فحاجة وحدة هيا يضبر للمقربات ديالو على فرص الشغل فمناصب مبرعة، بحال المفتشة العامة ديال وزارة الشغل مرات صاحبو فالبام، وبحال المسؤولة اللي عينها فالتكوين المهني التابع للوزارة، وبحال مرات صاحبو اللي عينها فلانابيك و اللي كانت مسؤولة على برنامج انا مقاول واخا فشلات عطاه بوسط كبير ديال مؤسسة عمومية ولاو الشباب كيطنزو عليه بشعار الكفيل فمواقع التواصل الاجتماعي.

برنامج انا مقاول اللي روجو ليه فواحد الحملة إعلامية كبيرة، وباعو للمغاربة الوهم باللي هاذ المشروع غيوفر مليون فرصة شغل غير مباشرة، تحول لأكبر كذبة حكومية حولها السكوري لمجرد حلم كيطاردوه الشباب الباحثين عن فرص عمل فمناخ اقتصادي واجتماعي قاصح وصعيب.
صحيح الأزمة كاينة فالعالم كامل والمغرب جزء من هاذ البيئة الدولية اللي تأثرات بالحروب والتوترات وتبعات كورونا، وأزمات الاقتصادات العالمية الكبرى، و لكن من الضروري الحكومة فشخص وزارة الشغل دخل باش تخفف الازمة، وخاص المغاربة لا سيما فئة الشباب يحسو را كاين شي مبادرات وإجراءات باش تخفف وتحتوي الازمة وتعطي الامل للشباب، وتبين حنة يديك راه كلشي كيطبل بالوزير السكوري وكفاءتو ولكن لحد الساعة السيد معارف يدير والو كيدور غي فبلاصتو.

يلا الوزير كتاشف الواقع المر خاصو يعتارف ويحط السوارت راه كيتخلص باش يدير حلول والمغاربة كيتسناو من وزارة الشغل بزاف ديال الحوايج وهو مضارب غي مع يديه ورجليه عفى الناس وفتح التباري على مناصب المسؤولية يعني عين أحسن مكاين ورا خاص هاذ الإجراءات تنعكس على أداء الوزارة وتبان المؤشرات على قطاع الشغل وأرقام البطالة وحركية القطاع ماشي جالس مربع يديه وكيتفرج بحالو بحال المغاربة راه سالى عهد الوزارة ديال البريستيج والصالير المضخم والتعويضات والسفريات بلا قيمة مضافة.